Շատ բան է արվել, սակայն, ցավոք, միջադեպեր են գրանցվում․ Պուտինը՝ Փաշինյանի և Ալիևի հետ հանդիպմանը

ՌԴ նախագահ Վլադիմիր Պուտինը շնորհակալություն է հայտնել Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին՝ Սոչիում եռակողմ բանակցություններին մասնակցելու հրավերին արձագանքելու համար, քանի որ «դրանք պայմաններ են ստեղծում Լեռնային Ղարաբաղի վերածննդի համար»։

«Եռակողմ հանդիպման նպատակը կայանում է նրանում, որպեսզի պայմաններ ստեղծվեն Լեռնային Ղարաբաղի վերածննդի համար»,- հայտարարել է Վլադիմիր Պուտինը։

Ըստ Պուտինի՝ դրական է, որ Լեռնային Ղարաբաղում լայնամասշտաբ ռազմական գործություններ չեն ընթանում, չնայած առանձին միջադեպեր լինում են։

«Այս ընթացքում շատ բան է արվել, սակայն, ցավոք, կան չլուծված հարցեր, միջադեպեր են գրանցվում սահմանին, ողբերգական դեպքեր են գրանցվում, երբ երկու կողմից էլ մարդիկ զոհվում են, վիրավորվում։ Սրանք հատուկ ուշադրության արժանի հարցեր են։ Եվ հենց նաև հանուն այդ հարցերի էլ այսօր հանդիպել ենք, որպեսզի խուսափենք ապագայում նման միջադեպերից։ Սակայն, ընդհանուր առմամբ, մեկ տարում շատ բան է արվել։ Լայնամասշտաբ ռազմական գործողություններ չեն ընթանում, ինչն արդեն լավ է»,- հայտարարել է Պուտինը՝ նշելով, որ ՌԴ-ի մասնակցությամբ մեծ թվով փախստականներ են վերադարձել իրենց մշտական բնակության վայրեր։

Պուտինը նաև հույս է հայտնել, որ մոտ ապագայում հնարավոր կլինի որոշումներ ընդունել Ղարաբաղում տրանսպորտային հաղորդակցությունների ապաշրջափակման վերաբերյալ։ Ռուսաստանը, Ադրբեջանը և Հայաստանը «պետք է ձգտեն ամրապնդել կապերը, ոչ թե քանդել դրանք»։

«Մենք դարեր շարունակ միասին ենք եղել՝ որպես մեկ պետության մաս, ունենք շատ խորը պատմական կապեր, և մենք չէինք ցանկանա, որ դրանք քանդվեն: Ընդհակառակը, մենք պետք է ձգտենք վերականգնել դրանք և պահպանել ապագայում»,- ասել է Պուտինը:

Տաթև Ֆռանգյան