Գույքի բռնագրավումը՝ որպես «ծայրահեղականների» դեմ պայքարի նոր միջոց Բելառուսում

Բելառուսի իշխանությունները չեն պատրաստվում դադարեցնել բռնաճնշումները և նոր ուղիներ են առաջարկում՝ հակառակորդների վրա ճնշում գործադրելու համար։ Այսպես՝ վերջերս Բելառուսում հանդես են եկել «ծայրահեղական կողմնորոշմամբ» հանցագործություն կատարած անձանցից գույքը բռնագրավելու առաջարկով։ Հաշվի առնելով, որ միայն 2021 թվականի հուլիսին իշխանությունները հայտնել են ծայրահեղականության հետ կապված ավելի քան 4,2 հազար դեպքերի մասին, այս նախաձեռնությունը կարող է ազդել բազմաթիվ բելառուսների վրա, գրում է DW-ի ռուսական ծառայությունը։

Կազմակերպված հանցավորության և կոռուպցիայի դեմ պայքարի գլխավոր վարչությունը (ГУБОПиК), որը վերջերս հաճախ է հանդես եկել տարբեր ռեպրեսիվ նախաձեռնություններով, առաջարկել է բռնագրավել «անցանկալի» քաղաքացիների գույքը։ Այս մասին նոյեմբերի 23-ին «Մինսկայա պրավդա»-ին տված հարցազրույցում ասել է ГУБОПиК-ի ղեկավար Անդրեյ Պարշինը։

Նա հայտարարել է, որ իր ղեկավարած գերատեսչությունը մյուս պետական մարմինների հետ մի շարք օրենսդրական նախաձեռնություններ է նախապատրաստում, որոնք ուղղված են պետության ազգային անվտանգության ապահովմանը։ Դրանց թվում է նաև «ծայրահեղականներին» քաղաքացիությունից զրկելը, ինչն արդեն վաղուց է քննարկվում Բելառուսում, իշխանությունների կողմից ծայրահեղական ճանաչված ինտերնետային ռեսուրսներին բաժանորդագրվելու դեպքում վարչական պատասխանատվությունը, ինչպես նաև «ծայրահեղականներից» ունեցվածքը խլելու նոր առաջարկը։

«Անհրաժեշտ ենք համարում նաև ծայրահեղական ուղղվածություն ունեցող հանցագործությունների համար, որպես հավելյալ պատիժ, ողջ ունեցվածքի առգրավում կիրառել»,- ասել է ГУБОПиК-ի ղեկավարը։

Տաթև Ֆռանգյան