ԱՆ-ն և Կառավարությունը ՍԴ-ին լրացուցիչ տեղեկություններ կտրամադրեն Ավանեսյանի որոշման հետ կապված

Սահմանադրական դատարանում այսօր շարունակվեց «Հայաստան» դաշինքի դիմումի քննությունը, որով վիճարկվում է առողջապահության նախարար Անահիտ Ավանեսյանի «ՀՀ բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության եւ ՀՀ առողջապահության նախարարի 2021թ․ օգոստոսի 20-ի N 65 հրամանը, համաձայն որի՝ հանրային աշխատողները կամ պետք է պատվաստվեն կորոնավիրուսի դեմ, կամ 14 օրը մեկ ներկայացնեն ՊՇՌ թեստի բացասական պատասխան։

Սահմանադրական դատարանն այսօր միանգամից մի քանի միջնորդություն բավարարեց։ Մասնավորապես, դատավոր Արևիկ Պետրոսյանը միջնորդել էր կառավարությունից պահանջել 5-օրյա ժամկետում ՍԴ-ին տրամադրել ՀՀ առողջապահության նախարարի 2021 թ.-ի օգոստոսի 4-ի հրամանով նախատեսված աշխատող անձանց կողմից հրամանով նախատեսված 14 օրը մեկ հետազոտության և պատվաստման հետ կապված պահանջները չկատարելու համար պատասխանատվության ենթարկելու, այդ պահանջի չկատարման արդյունքում աշխատանքից ազատման վերաբերյալ ամբողջական տեղեկություններ։

ԱԺ «Հայաստան» խմբակցության պատգամավոր Արամ Վարդևանյանն էլ նկատեց, որ կառավարությունը պարտավոր է այդ տեղեկություններն ունենալ, հետևաբար Սահմանադրական դատարանին դրանց տրամադրումը կարող է լինել նաև երկօրյա կամ եռօրյա ժամկետում, մինչդեռ պատասխանող կողմի ներկայացուցիչը խնդրեց պահպանել հնգօրյա ժամկետի պահանջը։

ՍԴ-ն բավարարեց նաև դատավոր Հրայր Թովմասյանի միջնորդությունը, որով կառավարությունից պահանջվում է դատարանին ներկայացնել պարտադիր պատվաստման կամ թեստավորման ԱՆ-ի հրամանով նախատեսված սուբյեկտների աշխատավարձի վերաբերյալ տեղեկություններ։

«Ինձ առավելապես հետաքրքրող տեղեկատվությունն այս սուբյեկտների մեջ նվազագույն աշխատավարձ ստացողների թվաքանակն է»,-ասաց Հրայր Թովմասյանը։

ՍԴ նախագահ Արման Դիլանյանն Էլ ասաց, որ դատարանը պահանջելու է ՍԴ-ին ներկայացնել շուկայում գործող թեստավորման նվազագույն և առավելագույն գները։ Բացի այդ դատարանին պետք է ներկայացվի նաև վիճակագրություն՝ կապված պատվաստված անձանց վարակելիության վերաբերյալ տեղեկությունների հետ։

Այս տեղեկությունները ՍԴ-ին ներկայացնելու համար սահմանվեց 5 աշխատանքային օր։ ՍԴ նախագահը նշեց՝ հիմքեր առաջացան դատաքննությունը հետաձգելու համար, և հաջորդ նիստը նշանակվեց դեկտեմբերի 16-ին։

Ռոզա Վարդանյան