Հերի՛ք է այս վայնասունը՝ սպանեցին, քանդեցին, զոհվեցինք․ Ադրբեջանի դեմ համազգային դիմադրություն պիտի ձևավորենք․ Անահիտ Ադամյան․ ՏԵՍԱՆՅՈՒԹ

Factor TV-ի հարցազրույցը պետական դասի 2-րդ աստիճանի խորհրդական, լրագրող Անահիտ Ադամյանի հետ

-Տիկի՛ն Ադամյան, Հայաստանի անվտանգային համակարգի ապահովման հարցում Դուք չափազանց մեծ տեղ եք տալիս տնտեսությանը՝ պնդելով՝ փող է պետք, որ բանակը վերազինվի։ Եվ հարց եք բարձրացնում, օրինակ, ինչո՞ւ ենք մերժում ատոմակայան կառուցելու՝ ամերիկյան կամ ֆրանսիական առաջարկը և ընդունում ռուսականը։ Միգուցե, այդ ֆենոմենը պետք է բացատրել նրանով, որ պետական պաշտոնյաներն այդպիսով պաշտպանությո՞ւն են փնտրում ՌԴ-ում։

-Այդ դեպքում հանդիպակաց հարց տամ՝ ՌԴ-ն բոլոր ուժերով պայքարում է ՆԱՏՕ-ի դեմ, չէ՞, անգամ հարաբերությունները խզեցին իրար հետ։ Կարո՞ղ եք ասել՝ ինչու է ՌԴ-ն որպես ՆԱՏՕ հասկանում միայն այն հատվածն այդ դաշինքի, որը տեղակայված է Եվրոպայում, Թուրքիան ՆԱՏՕ-ի անդամ չէ՞, ՆԱՏՕ-ն չի՞ ներկայացնում Թուրքիան, արդեն դո՞ւրս է եկել ՆԱՏՕ-ից։ Չկա, չէ՞, երկու ՆԱՏՕ։

-Համընկնող շահեր ունեն Ռուսաստանն ու Թուրքիան, համագործակցում են։

-Այսինքն՝ Դուք բանաձևում եք շահի գիտակցությունը։ Իսկ ինչո՞ւ Հայաստանի Հանրապետությունը չի բանաձևում շահի գիտակցությունը։ Գիտեք՝ եթե այդ մակարդակի ֆրանսիական կապիտալ մտնի այստեղ, եթե այստեղ մտնի անգլիական կապիտալ, եթե միլիարդներ մտնեն Հայաստան, նրանք ճիշտ այնպես պաշտպանելու են ՀՀ ազգային անվտանգությունը, ինչպես 44-օրյա պատերազմում բրիտանացիները պաշտպանում էին իրենց նավթամուղները։ Բա մենք այդ մասին ինչո՞ւ չենք մտածում։ Եթե մտավ կապիտալը, գալու են իրենց կապիտալը պաշտպանելու։

-Մեծ քաղաքականությունում մենք, կարծես թե, անտեսում ենք տնտեսական գործոնը՝ մի բան, որ այսօր շահեր է առաջ բերում նաև գլոբալ մակարդակում։ Ինչո՞ւ։

-Դե՝ ես ասացի, որ մենք մեր օրակարգում առաջնայինի և երկրորդականի խառնաշփոթ ունենք։ Առավոտից մենք քննարկում ենք՝ դեմարկացիա և դելիմիտացիա․․․ Շատ մեծ խելք պետք չի ունենալ՝ հասկանալու համար, որ ամեն ինչ գալիս է հանգում մի խնդրի՝ ԼՂ-ի կարգավիճակին։ Սողոմոն Իմաստուն պետք չի լինել՝ հասկանալու համար, որ Ադրբեջանը 44 օրում օգտագործելով Թուրքիայի ներուժը, օգտագործելով մոջահեդներին, Իսրայելի ռազմական արդյունաբերությունը, արգելված զենքեր կիրառելով, մարդկության դեմ հանցագործություն կատարելով՝ հասել է այնպիսի արդյունքի, որը չէր երազի, որ դուք էլ ասացիք՝ մի բան էլ ավելի ստացավ պատերազմով։ Հիմա, միանշանակ է, որ առավելագույնը պետք է պոկի պարտված կողմից։

-Պիտի չզարմանանք Ադրբեջանի բացված ախորժակից և ռազմական սադրանքներից։ Այլ հարց է՝ ո՞րն է Հայաստանի անելիքը և ի՞նչ ռեսուրսներ ունենք։

-Գիտեք՝ ոչ թե պիտի լինի ամբողջ հասարակությունով, քաղաքական և լրատվական դաշտով վայնասուն բարձրացնենք առավոտից մինչև իրիկուն՝ վա՛յ, սպանեցին, քանդեցին, տարան, զոհվեցինք, մեռանք, չգիտեմ ինչ, այլ համազգային դիմադրություն ձևավորենք Ադրբեջանի դեմ։ Ինչպե՞ս, շատ պարզ՝ ամեն մարդ պիտի անի իր գործը։ Ամեն առավոտ մարդ չպիտի արթնանա և մտածի՝ ի՞նչ են պոկելու ինձնից, այլ՝ ի՞նչ եմ ես այսօր անելու, որ դա չպոկեն։ Այսօր մեր գլխավոր խնդիրը մնում է տնտեսությունը։

Հարցազրույցն ամբողջությամբ՝ տեսանյութում։

Ռոբերտ Անանյան