Ստեղծված իրավիճակում դեմարկացիայի և դելիմիտացիայի գործընթաց սկսելու նախադրյալ չկա. Սեյրան Օհանյան․ ՏԵՍԱՆՅՈՒԹ

Հայաստան» խմբակցությունն այսօր խորհրդարանական լսումներ է նախաձեռնել Հայաստանի և Ադրբեջանի միջև սահմանազատման և սահմանագծման հիմնախնդիրների վերաբերյալ:

Նիստին մասնակցում են ընդդիմադիր պատգամավորներ, արտախորհրդարանական ուժերի ներկայացուցիչներ, զինվորականներ, հասարակական և մտավորական գործիչներ, փորձագետներ: Նշենք, որ իշխող «Քաղաքացիական պայմանագիր» խմբակցությունը չի մասնակցում սահմանագծման և սահմանազատման վերաբերյալ լսումներին:

ԱԺ փոխնախագահ Իշխան Սաղաթելյանն ընդգծեց, որ ստեղծված իրավիճակում շատ կարևոր է նման ձևաչափով քննարկումներ անել.

«Սա նաև դիտարկում ենք լավ հնարավորություն խորհրդարանից դուրս գտնվող մեր գործընկերների համար՝ ԱԺ ամբիոնից իրենց դիրքորոշումները և տեսակետները հնչեցնելու, համատեղ բովանդակային քննարկում կազմակերպելու համար։  Սա նրանց հնարավորություն կտա ԱԺ ամբիոնն օգտագործել՝ մեր հանրությանը կոչ ուղղելու, իշխանության առաջ հստակ պահանջներ դնելու համար»,-ասաց Սաղաթելյանը:

«Սահմանազատման և սահմանագծման գործընթացն անց է կացվում Հայաստանի և Արցախի շուրջ ստեղծված բարդ ռազմաքաղաքական իրավիճակում»,- հանդես գալով զեկույցով՝ նշեց «Հայաստան» խմբակցության ղեկավար Սեյրան Օհանյանը։

Նրա խոսքով՝ ավելի փխրուն է դարձել անվտանգային միջավայրը և ահագնացող սպառնալիքները ստիպում են իրավիճակին համարժեք պատասխանել։ Լսումների նպատակը, ըստ Օհանյանի, ներկաների հետ միասին վեր հանել բոլոր հիմնախնդիրները, որոնք կապված են առանց համապատասխան պայմանների սահմանների ճշտման գործընթացի հետ։

«Ըստ դելիմիտացիայի և դեմարկացիայի միջազգային փորձի, դրանց լեգիտիմության կարևոր չափանիշներն են միջազգային օրենքի գերակայությունը, ժողովրդավարությունը, մարդու իրավունքները և բոլոր սահմանների անխախտելիությունը, որը կարող է միայն փոխվել խաղաղ ճանապարհով՝ կողմերի համաձայնությամբ։ Անհրաժեշտ է, որ հակառակորդ պետությունները դառնան խաղաղ պայմաններում ապրելու պատրաստ պետություններ՝ մանավանդ ունենալով պատշաճ մակարդակի դիվանագիտական հարաբերություններ ու փոխվստահություն և այդ գործընթացը պետք է իրականացնի հատուկ հանձնաժողովը»,- նշեց Օհանյանը:

Նա նաև հավելեց, որ պետությունը պետք է իմանա ի՞նչ է ուզում, ինչպիսի՞ նախադրյալներ կան և որո՞նք են առաջնահերթությունները. «Այժմ գործընթացը իրականացնելու համար անհրաժեշտ նախադրյալներ չկան»։

Մանրամասները՝ տեսանյութում: