16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Ջո Բայդենի աղիից հեռացված պոտենցիալ նախաքաղցկեղային պոլիպը բարորակ է․ NBC News
Քաղաքականություն
25.11.2021 | 16:21
Հյուսվածքաբանական հետազոտությունը հաստատել է, որ ԱՄՆ նախագահ Ջո Բայդենի աղիից հեռացված պոլիպը բարորակ է, սակայն պոտենցիալ նախաքաղցկեղային: Այս մասին ասվում է ամերիկացի առաջնորդի բժիշկ Քևին Օ’Քոնորի հայտարարության մեջ, գրում է nbcnews-ը։
«Նախագահ Բայդենի հաստ աղիից հեռացվել է երեք միլիմետրանոց բարորակ պոլիպ: Հյուսվածքաբանական հետազոտության համար վերցված նմուշը նույնականացվել է որպես խողովակային ադենոմա»,- ասված է Օ’Քոնորի հայտարարության մեջ, որը տարածվել է Սպիտակ տան կողմից։
Անցյալ շաբաթ 79-ամյա Բայդենը բուժզննում է անցել, որի արդյունքում բժիշկները եկել են եզրակացության, որ նրա առողջական վիճակը թույլ է տալիս առանց սահմանափակումների կատարել պետության ղեկավարի և գերագույն գլխավոր հրամանատարի պարտականությունները։
Նոյեմբերի 19-ին Բայդենը ժամանակավորապես իր պարտականությունները փոխանցել էր փոխնախագահ Քամալա Հարիսին, քանի դեռ անզգայացման տակ հիվանդանոցում էր։ Սա Բայդենի իշխանության գալուց հետո առաջին դեպքն էր, երբ երկրի ղեկավարի պարտականությունները դրվել է փոխնախագահի վրա, ինչպես նաև առաջին դեպքը, երբ ԱՄՆ իշխանության ղեկին սևամորթ կին է հայտնվել։
Տաթև Ֆռանգյան
