Հայկական Շուշին հռչակվելու է Թյուրքական աշխարհի մայրաքաղաք

Ադրբեջանի մշակույթի նախարար Անար Քերիմովը հայտարարել է, որ Արցախի գրավյալ հայկական Շուշի քաղաքը 2023 թվականին հայտարարվելու է Թյուրքական աշխարհի (TurkSoy) մայրաքաղաք, գրում են ադրբեջանական լրատվամիջոցները։

Նշվում է, որ Քերիմովը նման հայտարարություն է արել «Մեծ վերադարձ, մշակույթի վերածնունդ» կոնֆերանսի ընթացքում։

«Իրականում այդ մասին հայտարարվելու է TurkSoy-ի նիստի ընթացքում։ Սակայն իրադարձություններից առաջ անցնելով՝ ցանկանում եմ ասել, որ Շուշին հռչակվելու  է TurkSoy-ի մշակութային մայրաքաղաք։ Մենք անցկացնելու ենք միջոցառումներ   բոլոր թյուրքալեզու եղբայրների մասնակցությամբ»,- ասել է Քերիմովը։

Նշենք, որ այս տարի սեպտեմբերին Ադրբեջանի մշակույթի նախարարը Ուզբեկստանի Խիվա քաղաքում «Թյուրքական մշակույթի» միջազգային կազմակերպության նախարարների խորհրդի 38-րդ նիստում հայկական Շուշիի թեկնածությունն առաջադրել էր որպես 2023թ․ Թյուրքական աշխարհի մայրաքաղաք։

Թյուրքական մշակույթի և ժառանգության միջազգային հիմնադրամի նախագահ Գյունայ Էֆենդիևան էլ Ստամբուլում Թյուրքալեզու պետությունների համագործակցության խորհրդի ԱԳ նախարարների 8-րդ նիստում ունեցած ելույթում առաջարկել էր թյուրքական աշխարհի մշակութային կենտրոն կառուցել Շուշիում։

Նշենք, որ բացի այդ՝ Ադրբեջանը աշխատանքներ է տանում՝ հայկական Շուշին ՅՈՒՆԵՍԿՕ-ի համաշխարհային մշակութային ժառանգության ու ստեղծարար քաղաքների ցանցում ընդգրկելու ուղղությամբ։

Հավելենք, որ Ադրբեջանը հետևողականորեն շարունակում է ոչնչացնել Շուշիի հայկական պատմական, մշակութային, հոգևոր ժառանգությունը՝ ձգտելով ամեն կերպ քաղաքից վերացնել հայկական հետքերը։ Միաժամանակ, Ադրբեջանն ամեն կերպ խոչընդոտում է Արցախ UNESCO-ի առաքելության մուտքը։

Էմմա Չոբանյան