Երկիր թալանած, լափած ոհմակը խոսում է հայրենասիրությունից․ ասե՛ք, ո՞նց եք թուլացրել պաշտպանունակությունը․ Հակոբ Ասլանյան․ ՏԵՍԱՆՅՈՒԹ

Factor TV-ի զրուցակիցն է ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանը

-Պարո՛ն Ասլանյան, Դուք նշում եք, որ իբրև պետություն կամ հասարակություն՝ դեռ չենք կարողանում կոնկրետավորված ձևակերպել մեր պետական շահերը։ Դա ինքնախոստովանություն չէ՞ թույլ տրված բացթողման՝ հենց կառավարող ուժի կողմից։

-Կառավարող ուժը չի դա, ամբողջ երկիրն է։ Դուրս եկեք հասարակության մեջ և տեսեք, որ ինքը՝ հասարակությունը, երկփեղկված է, որովհետև չի կարողանում գալ մի կետի, որտեղ բոլորն ասեն՝ այս կետը շահավետ է մեզ բոլորիս։

-Դա չի լինելու, քանի որ կան բազմաթիվ քաղաքական հոսանքներ և շարժումներ, որոնք տարբեր պատկերացումներ ունեն։ Կառավարող ուժը պետք է այս պահին ձևակերպի ՀՀ շահը և պաշտպանի։

-Այսօր դրվում է դրա հիմքը։ Օրինակ՝ ինչո՞ւ այսօրվա ռևանշիստ ընդդիմախոսները չեն ցանկանում, որ մեր երկիրը մեջքն ուղղի։ Ինչո՞ւ չեն ցանկանում, որ զարգացումներ լինեն։

-Փողոցային ընդդիմությունը, որ նաև խորհրդարանում է ներկայացված, կառավարող ուժին մեղադրում է Արցախը հայաթափելու, Հայաստանը թրքացնելու մեջ։

-Ինչպե՞ս են իրենք փրկելու Հայաստանը, երբ 30 տարի ոչինչ չեն արել Հայաստանի համար։ Ավելի քան 25-26 տարի հայ-ադրբեջանական սահման չկար, որովհետև սահմանից 100-ավոր կիլոմետրեր առաջ էին կանգնած մեր զորքերը։ Այդ դեպքում՝ ՀՀԿ-ն, ՀՅԴ-ն, որ իշխում էին այս երկրում, եթե իրենք մի քիչ հայրենասեր լինեին, այդ տարիների ընթացքում հանգիստ կարելի էր սահմանազատել և այնպես ամրացնել ՀՀ սահմանը, որ թուրքը առաջ չգա։ Ճշմարտությո՞ւն է, թե՞ ոչ։ Բայց դա չեն արել։

-Ես ընդունում եմ Ձեր նշածը, բայց Դուք էլ ընդունեք, որ այս մեկ տարում ձեր իշխանության օրոք չկահավորվեցինք դիրքերը, ադրբեջանցիները քայլելով գալիս-մտնում էին դիրք։ Դուք էլ ունեք բացթողում, եկեք դա էլ ընդունեք։ Կամ առանց սահմանազատման ինչո՞ւ ենք թույլ տալիս Գորիս-Կապան ճանապարհին մաքսակետեր տեղադրել։

-Մեդիատեռորով լցված է ժողովրդի ականջը։ Գորիս-Կապան ճանապարհի 21 կիլոմետրը բոլորովին էլ պետք չէ արդեն, որովհետև մենք արդեն ունենք իրական մեր ճանապարհը և շատ ճանապարհներ կարճ ժամանակում պատրաստվեցին, իրենց դրած անցակետերը թող իրենց մնան։ Այդ 21 կմ-ն Ադրբեջանի ԽՍՀ սահմանով էր անցնում, բայց եթե մենք այդ տարիներին ամրություններ կառուցեինք այդտեղ, Ադրբեջանը չէր ասի՝ Հայաստանն այս ինչ է անում, մենք մեր սահմանները կգծեինք։

-Երբ վարչապետը 2020-ի դեկտեմբերին հրաման արձակեց բանակին՝ հետ նահանջել, ինչո՞ւ մինչ այդ մենք լավագույն դիրքերը չզբաղեցրինք։

-Որովհետև դիրքեր չկային։

-Բայց սարերը կային, չէ՞։ Եկան իրենք զբաղեցրին բարձունքները։

-Սարերը կային՝ ի՞նչ, դիրքեր չկային, և հարցն այն է՝ այստեղից ադրբեջանական գործակալները միանգամից հաղորդում էին՝ այսինչ տեղերում ոչինչ չկա, և ադրբեջանական զորքը հայտնվում էր այդտեղ։ Կա մի հետաքրքիր բան փիլիսոփայության մեջ, կոչվում է պատճառահետևանքային կապ, այսօր մենք հետևանքներն ենք քաշում։ Այնքան խորն են այդ պատճառները, նախկին իշխանությունները հենց սկզբից էլ իմացել են, որ այդ տարածքները չեն պահելու, չեն կառուցվել կարևորագույն ճանապարհները, չեն բնակեցվել այդ տարածքները, որովհետև հետ էին տալու։ Հիմա սրբի դեմք են ընդունել, երկիրը թալանած, երկրի հարստությունները լափած ինչ-որ ոհմակ հայրենասիրությունից է խոսում, թող նախ ասեն՝ ի՞նչ են արել այս երկրին, ո՞նց են ոչնչացրել պաշտպանունակությունը, կրթությունը։

Հարցազրույցն ամբողջությամբ՝ տեսանյութում։

Ռոբերտ Անանյան