Քաղաքականություն
24.11.2021 | 14:10
ԵՄ-ի կողմից դեպի Բելառուս մարդկանց թրաֆիքինգի կանխարգելումն արդյունավետ է եղել Կենտրոնական Ասիայի տարածաշրջանում։ Այս մասին այսօր Դուշանբեում լրագրողներին ասել է Եվրամիության արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Ջոզեպ Բորելը, հայտնում է Euractive-ը։
«Ամբողջ տարածաշրջանը հանձնառություն է հայտնել դադարեցնել ներգաղթյալների հոսքը դեպի Բելառուս»,- ասել է ԵՄ գլխավոր դիվանագետը տարածաշրջան կատարած քառօրյա այցի ավարտին։
Դուշանբեում ԵՄ բարձր մակարդակի պատվիրակությունը մասնակցել է ԵՄ-Կենտրոնական Ասիա հանդիպմանն իր գործընկերների հետ, որի գլխավոր օրակարգը եղել է Աֆղանստանում և դրա շուրջ տիրող իրավիճակը։ Բորելը հայտարարել է, որ տարածաշրջան այցելությունը շատ արդյունավետ է եղել։
Ուզբեկստանը եղել է վերջին երկրներից մեկը, որը սահմանափակումներ է մտցրել դեպի Բելառուս թռիչքների համար կես տասնյակ երկրներից, այդ թվում՝ Աֆղանստանից, Իրաքից, Լիբանանից, Լիբիայից, Սիրիայից և Եմենից տարանցիկ ուղևորների համար։
Պատասխանելով հարցին՝ արդյո՞ք ԵՄ-ն կխնդրի Աֆղանստանի և Կենտրոնական Ասիայի հարևաններին՝ ավելի շատ գործողություններ ձեռնարկել միգրացիոն հոսքերը կանխելու համար, Բորելը պատասխանել է, որ «հետագա գործողությունների կարիք չկա, քանի որ այդ երկրների իշխանություններն արդեն իսկ խստորեն հետևում են այդ հարցին»:
Տաթև Ֆռանգյան
