Ալիևը հայտարարում է՝ «որտեղ ուզենք կկանգնենք». սա պետք է դառնա միջազգային քննարկման առարկա. Փաշինյան․ ՏԵՍԱՆՅՈւԹ

Ադրբեջանի գործելակերպը մեր դիվանագիտական ու արտաքին քաղաքականության քննարկման կարևոր առարկաներից մեկը պետք է լինի: Այսօր հրավիրված ասուլիսի ժամանակ հայտարարեց ՀՀ վարչապետ Նիկոլ Փաշինյանը:

«Պիտի ասեմ, որ Ադրբեջանը որդեգրել է շարունակական ագրեսիայի քաղաքականություն Հայաստանի նկատմամբ ու կարծում եմ, որ այս թեման այլևս պետք է լինի միջազգային հանրության քննարկման կիզակետում:

Ադրբեջանը պատերազմից հետո, լինելով էյֆորիայի մեջ, փորձ է անում կիրառել «պատերազմում հաղթողի» իրավունքը:

Մենք շատ համբերատար փորձում ենք ամեն կառուցողական ջանք գործադրել, որպեսզի տարածաշրջանում իրադրությունը հանդարտվի, բայց, ի վերջո, կարծում եմ, որ միջազգային հանրության անդամը պետք է որոշակի չափեր ունենա ու միջազգային հանրությունը պետք է չափերին հետևի, հակառակ դեքպում, միջազգային հարաբերությունների քայքայման գործընթաց է տեղի ունենում»,- նշեց վարչապետը:

Փաշինյանն ընդգծեց, որ Ադրբեջանը Հայաստանի նկատմամբ տարածքային նկրտումներ է ցուցաբերում: «Ի՞նչ է նշանակում «Զանգեզուրի միջանց», «Արևելյան Զանգեզուր», այդ ովքե՞ր են այդ տերմինները հորինում ու ի՞նչ է դա նշանակում: Մենք նախկինում հայտարարել ենք ու հիմա էլ հայտարարում ենք, որ միջանցքային տրամաբանության հարց չենք քննարկել, չենք քննարկում ու չենք քննարկելու, ինչը չի նշանակում, որ որևէ կերպ մենք հրաժարվում ենք տարածաշրջանային կոմունիկացիների բացման օրակագրից, ես չեմ կարող թաքցնել ու ուղիղ պիտի ասեմ՝ գուցե Հայաստանն է ավելի շահագրգիռ, որ տարածաշրջանային կոմունիկացիաները բացվեն»:

«Ալիևը հայտարարում է՝ «որտեղ ուզենք կկանգնենք». սա պետք է դառնա միջազգային լրջագույն քննարկման առարկա»,- ընդգծեց վարչապետը:

Մանրամասները՝ տեսանյութում: