19.11.2024 | 18:32
Երևանաբնակ 100-ամյա տարեցները 1-ական մլն դրամ կստանան․ ՏԵՍԱՆՅՈՒԹ
Գյումրու ծննդատանը 100-ով ավելացել է ծնունդների թիվը՝ 330-ից դառնալով 430․ ՏԵՍԱՆՅՈՒԹ
Հասարակություն
23.11.2021 | 18:04
Գյումրու ծննդատանն ավելացել է ծնունդների թիվը․ նախորդ տարվա 330-ի փոխարեն այս տարի ծնվել են 430 փոքրիկներ։ Ավելացել է նաև հսկողության տակ գտնվող հղիների թիվը․ նախորդ տարի գրանցվել են 180 հղիներ, այժմ՝ դեռ 2021 թվականը չավարտված՝ 215։ Նկատելի է նաև գինեկոլոգիական վիրահատությունների թվի աճ՝ 30 տոկոսով։
Այս մասին Factor.am-ի հետ զրույցում տեղեկացրեց «Գյումրու ԲԿ» գործադիր տնօրեն Արմեն Իսահակյանը՝ նշելով, որ այս հարցում մեծ դերակատարություն է ունեցել ծննդատունը Գյումրի բժշկական կենտրոնի հետ միավորելը, շենքը կապիտալ վերանորոգման ենթարկելը, պայմանները բարելավելն ու ժամանակակից սարքավորումներով զինելը։
Հիշեցնենք, որ տարիներ շարունակ կառավարությունը քննարկում էր Գյումրու ծննդատունը փակելու հարցը՝ պատճառաբանելով կուտակած պարտքերը։ Այժմ շենքն անճանաչելիորեն փոխվել է, պարտքերը ևս մարվել։
«Գյումրու ԲԿ» գործադիր տնօրենը վստահեցնում է՝ ծնունդների թիվն ավելի է աճելու, քանի որ իրականացնում են այցեր Շիրակի մարզի հեռավոր տեղանքներ՝ Ամասիայի, Աշոցքի բնակավայրեր, որտեղ հղիների համար ոչ միայն մանակաբարձագինեկոլոգներն են խորհրդատվություններ անցկացնում, այլ նեղ մասնագետները՝ անոթաբանները, թերապևտները։
«Ծննդատունը ռազմավարական նշանակության կառույց է, ու յուրաքանչյուր հայ ընտանիքի ամենակարևոր քայլը պիտի լինի կորցրած հերոսների կողքին նորերին ծնելը, վերարտադրությունն ապահովելը, Հայաստանի Հանրապետության բնակչության թվի աճին նպաստելը։
Մենք պետք է զավակներ ծնենք, որոնք կպաշտպանեն իրենց հայրենիքը, պիտի ունենանք հզոր բանակ, հզոր պետություն, որ կարողանանք դիմակայել տարածաշրջանի բոլոր մարտահրավերներին»,- ասում է Արմեն Իսահակյանը։
Արմիկ Մովսիսյան
