24.01.2026 | 20:33
«Ինտերը» հայերեն գրառում է արել Հենրիխ Մխիթարյանի գոլի առթիվ․ ՏԵՍԱՆՅՈՒԹ
Շախմատի թիմային ԵԱ․ Հայաստանը զբաղեցրեց 7-րդ տեղը
22.11.2021 | 21:50
Սլովենիայում ավարտվել է շախմատի Եվրոպայի թիմային առաջնությունը, որի արդյունքներով Հայաստանի տղամարդկանց հավաքականը 12 միավորով զբաղեցրել է 7-րդ հորիզոնականը։
Հայաստանի հավաքականը, որը վերջին տուրից առաջ առաջատարն էր, 9-րդ տուրում մրցել է Ուկրաինայի թիմի հետ և 1-3 հաշվով պարտություն կրել։ Հայաստանի հավաքականի կազմում ոչ-ոքի են խաղացել Ռոբերտ Հովհաննիսյանն ու Սամվել Տեր-Սահակյանը, իսկ Գաբրիել Սարգսյանն ու Հայկ Մարտիրոսյանը պարտություն են կրել։
Ի դեպ, սա Հայաստանի հավաքականի առաջին ու միակ պարտությունն էր Եվրոպայի թիմային առաջնությունում։ Նախորդ 8 տուրերում մեր թիմը 3,5։0,5 հաշվով հաղթել էր Բելգիայի, 2,5։1,5 հաշվով՝ Իսրայելի և Ֆրանսիայի թիմերին, 2։2 հաշվով ոչ-ոքի էր խաղացել Նորվեգիայի, Գերմանիայի, Ադրբեջանի, Իսպանիայի թիմերի հետ, ինչպես նաև 3,5։0,5 հաշվով առավելության էր հասել Սերբիայի նկատմամբ։
Եվրոպայի թիմային առաջնության չեմպիոնի տիտղոսը նվաճել է հենց Ուկրաինայի թիմը՝ վաստակած 14 միավորով։ Նույնքան միավոր է վաստակել նաև Ֆրանսիայի թիմը, որը վերջին տուրում 2,5։1,5 հաշվով առավելության է հասել Ադրբեջանի թիմի նկատմամբ, բայց ֆրանսիացիները լրացուցիչ ցուցանիշներով զբաղեցրել են երկրորդ հորիզոնականը։
Ի դեպ, ֆրանսիացիներին հաղթանակ է պարգևել իրանցի Ալիռեզա Ֆիրուջան՝ սպիտակներով հաղթելով Շահրիյար Մամեդյարովին։ Մյուս պարտիաներն ավարտվել են ոչ-ոքի։ Ֆրանսիան 20 տարվա մեջ առաջին անգամ է նվաճել թիմային ԵԱ-ի արծաթե մեդալները։ Լավագույն եռյակը եզրափակել է Լեհաստանի թիմը՝ 13 միավորով։
Կանանց Հայաստանի հավաքականն էլ, վերջին տուրում 3։1 հաշվով հաղթելով Չեխիայի թիմին, 10 միավորով գրավել է 11-րդ տեղը։ Մրցաշարի հաղթողի տիտղոսն ապահովել է Ռուսաստանի թիմը։
