06.06.2026 | 18:40
Ստեփանավանի տարածաշրջանում կարկուտ է տեղացել․ կան վնասներ
Սյունիքի մարզպետ Մելիքսեթ Պողոսյանի որդին ազատ կարձակվի
Հասարակություն
18.11.2021 | 10:52
Սյունիքի մարզպետ Մելիքսեթ Պողոսյանի որդու` Կարեն Պողոսյանի կալանավորման ժամկետը չի երկարացվի: Ինչպես Factor.am-ի հետ զրույցում տեղեկացրեց Քննչական կոմիտեի մամուլի քարտուղար Վարդան Թադևոսյանը, ՔԿ-ն դատարան էր ներկայացրել Պողոսյանի խափանման միջոց կալանքը ևս երկու ամսով երկարացնելու մասին միջնորդությունը, սակայն դատարանը որոշում էր կայացրել մերժել այն։
Հիշեցնենք՝ 2021 թվականի հուլիսի 13-ին Գորիս քաղաքում կրակոցներ էին հնչել, ինչի հետևանքով վնասվածքներ էր ստացել երկու անձ։ Տուժածներից մեկը Սյունիքի նախկին մարզպետ Սուրիկ Խաչատրյանի աներորդին էր, մյուսը՝ Հարություն Վարդանյանը՝ գործող մարզպետի որդու՝ Կարեն Պողոսյանի ընկերը։ Դեպքի առթիվ հարուցված քրեական գործի շրջանակներում Պողոսյանը ներգրավվել էր որպես մեղադրյալ՝ սպանության փորձ կատարելու և ապօրինի զենք կրելու հոդվածներով, նրա նկատմամբ հայտարարվել էր հետախուզում:
Երկու ամիս հետախուզման մեջ գտնվելուց հետո մարզպետի որդին ինքնակամ ներկայացել էր Քննչական կոմիտե, ապա սեպտեմբերի 24-ին՝ կալանավորվել:
Ռոզա Վարդանյան
