19.11.2024 | 20:26
Կոչ ենք անում Վրաստանին վերադառնալ եվրատլանտյան ինտեգրման ուղի․ ՆԱՏՕ-ի գլխավոր քարտուղար
Այսօր ՏԻՄ ընտրություններ են անցկացվում 4 մարզերի 5 համայնքներում
Քաղաքականություն
14.11.2021 | 08:12
Այսօր՝ նոյեմբերի 14-ին, համամասնական ընտրակարգով ՏԻՄ ընտրություններ են անցկացվում Լոռու մարզի Ստեփանավան, Սյունիքի մարզի Կապան, Տավուշի մարզի Իջևան համայնքներում։
Այս 3 համայնքում ՏԻՄ ընտրությունների նախապատրաստման համար կառավարությունը ոստիկանությանը հատկացրել էր 25 մլն 249 հազար դրամ։
Իսկ մեծամասնական ընտրակարգով ընտրություններ են անցկացվում Կոտայքի մարզի Արզնի և Լոռու մարզի Լերմոնտովո համայնքներում։
Վերոնշյալ համայնքներից ընտրելու իրավունք ունեցող քաղաքացիների թվով ամենամեծը Իջևանն է՝ 33 հազար 56 ընտրողով, Կապանը 31 հազար 820 ընտրող ունի, Ստեփանավանը՝ 13 հազար 335։ Կոտայքի մարզի Արզնի համայնքում 2256 քաղաքացի ընտրելու իրավունք ունի, իսկ Լոռու մարզի Լերմոնտովո համայնքում՝ 681։ Քվեարկությունը մեկնարկել է ժամը 08:00-ին և կտևի 12 ժամ։ Ժամը 20:00-ին տեղամասերի փակվելուց հետո կսկսվի ձայների հաշվարկը։
Հիշեցնենք, որ հոկտեմբերի 17-ին հանրապետության 6 մարզի 9 համայնքում ևս տեղական ինքնակառավարման մարմնի ընտրություններ անցկացվեցին: Համամասնական ընտրակարգով ընտրություններ կայացան Գորիսում, Գյումրիում, Մեղրիում, Տեղում, Տաթևում, Դիլիջանում, իսկ Շամիրամում, Ֆերիկում և Ֆիոլետովոյում՝ մեծամասնական ընտրակարգով։
ՏԻՄ ընտրությունների վերջին փուլը տեղի կունենա դեկտեմբերի 5-ին 9 մարզերի 36 համայնքներում։ Քաղաքացիներն ընտրության կգնան Արագածոտնի մարզի Աշտարակ, Ապարան, Թալին, Արարատի մարզի Արարատ, Արտաշատ, Մասիս, Վեդի, Արմավիրի մարզի Արաքս, Արմավիր, Բաղրամյան, Խոյ, Մեծամոր, Վաղարշապատ, Փարաքար, Գեղարքունիքի մարզի Գավառ, Մարտունի, Սևան, Վարդենիս, Լոռու մարզի Թումանյան, Սպիտակ, Վանաձոր, Փամբակ, Կոտայքի մարզի Աբովյան, Գառնի, Ծաղկաձոր, Նոր Հաճն, Հրազդան, Նաիրի, Շիրակի մարզի Ախուրյան, Ամասիա, Աշոցք, Արթիկ, Վայոց ձորի մարզի Եղեգնաձոր, Ջերմուկ, Վայք և Տավուշի մարզի Նոյեմբերյան համայնքներում։
Մերի Մարտիրոսյան
