25.04.2026 | 09:21
Դավիթ Չալոյանն ապրիլի 24-ին հաղթել է թուրք բռնցքամարտիկի ու դուրս եկել կիսաեզրափակիչ․ ՏԵՍԱՆՅՈՒԹ
ԵԱՀԿ Մինսկի խմբի հայտարարությունը՝ Միրզոյան-Բայրամով փարիզյան հանդիպումից հետո
Քաղաքականություն
11.11.2021 | 20:25
ԵԱՀԿ Մինսկի խմբի համանախագահներ Էնդրյու Շոֆերը (ԱՄՆ), Իգոր Խովաևը (ՌԴ) և Բրիս Ռոքֆոյը (Ֆրանսիա) այսօր հայտարարություն են տարածել, որում, մասնավորապես, ասվում է․
«Համանախագահները նոյեմբերի 10-ին Փարիզում առանձին հանդիպել են Ադրբեջանի արտգործնախարար Ջեյհուն Բայրամովի և Հայաստանի արտգործնախարար Արարատ Միրզոյանի հետ: Տեղի է ունեցել նաև համանախագահների համատեղ հանդիպումը երկու արտգործնախարարների հետ, որը բացել է Ֆրանսիայի արտգործնախարար Ժան-Իվ Լը Դրիանը: Հանդիպումներին մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը։
Համանախագահները և արտգործնախարարները շարունակել են Նյու Յորքում սկսված քննարկումները մի շարք հնարավոր ապաէսկալացիոն միջոցառումների և գործընթացի հետագա քայլերի վերաբերյալ, ներառյալ՝ այս ձևաչափով հետագա հանդիպումները և համանախագահների առաջարկը՝ այց կատարել տարածաշրջան։
Համանախագահները և նախարարները քննարկել են նաև նոյեմբերի 9-ի եռակողմ հայտարարությամբ ստանձնած պարտավորությունների կատարման ընթացքը։
Համանախագահները վերահաստատել են մարդասիրական հարցերում առաջընթացի հասնելու կարևորությունը, ներառյալ՝ գերիները, ականազերծումը, անհետ կորածները, տեղահանվածների կամավոր վերաբնակեցումն ու պատմական և մշակութային վայրերի պաշտպանությունը, և կողմերին կոչ են արել ապահովել միջազգային մարդասիրական կազմակերպությունների հասանելիությունը։
Համանախագահները նաև ընդգծել են սադրիչ գործողություններից և հռետորաբանությունից զերծ մնալու կարևորությունը
Համանախագահները նոյեմբերի 10-ին և 11-ին հանդիպել են Ֆրանսիայի արտաքին գործերի նախարարության և Ելիսեյան պալատի ներկայացուցիչների հետ։ Քննարկվել է իրենց մանդատի համաձայն շարունակական ջանքերի կարևորությունը՝ օգնելու կողմերին համապարփակ լուծումներ գտնել Լեռնային Ղարաբաղի հակամարտությանն առնչվող կամ դրանից բխող մնացած բոլոր հարցերի համար»։
