29.03.2025 | 21:28
Լռության օրվա սահմանափակումները խախտվել են․ «Անկախ դիտորդը» ԿԸՀ դիմում է ներկայացնելու
Գորիս-Կապան ճանապարհի անցակետի պատճառով Բարձրավան համայնքը հայտնվել է մեկուսացման մեջ․ ՏԵՍԱՆՅՈՒԹ
Քաղաքականություն
11.11.2021 | 18:15
Գորիս-Կապան ճանապարհին տեղադրված ադրբեջանական անցակետը լուրջ խնդիրներ է ստեղծել Գորիսից 33 կմ հեռավորության վրա գտնվող Բարձրավան համայնքում։
Այսօր գյուղից ոչ ոք չի էլ փորձել դուրս գալ, որովհետև գիտեին, որ ճանապարհը փակ է, Factot TV-ի հետ զրույցում ասաց Բարձրավան համայնքի վարչական ղեկավար Օնիկ Ավագյանը։ Փակ ճանապարհի պատճառով այսօր գյուղ չեն կարողացել հասնել նաև ուսուցիչները, որոնք ամեն օր Գորիսից Բերդավան էին գալիս։ Թե ինչպես է հարցը կարգավորվելու՝ վարչական ղեկավարը դեռ չգիտի։
Դեպի գյուղ տանող այլընտրանքային ճանապարհի կառուցման աշխատանքները դեռ ավարտված չեն․ 10 կմ երկարությամբ ճանապարհի միայն կեսն է առայժմ պատրաստ։ Մինչ այդ գյուղից կարող են դուրս գալ միայն ամենագնացները։ Գյուղ չեն կարողանում հասնել նաև շտապօգնության մեքենաները։ Երբ այլընտրանքային ճանապարհը պատրաստ լինի, միևնույնն է, խնդիրներ էլի կլինեն, ասում է Օնիկ Ավագյանը։
«էս այլընտրանքայինը նախկին ճանապարհից երկարացնում ա կրկնակի։ Էն ժամանակ Գորիսից 33 կմ էր, հիմա ճանապարհը կդառնա 70 կմ։ Գյուղմթերք ամենօրյա ռեժիմով չէ, բայց ժողովուրդը անասնապահությամբ է զբաղվում, մարշուտկայով միս, կաթ, տանում էին, հիմա դա էլ ա դառնում խնդիր, ճանապարհը երկարում ա, ժողովրդի ծախսերն էլ են ավելանում։ Հիմա մի տեղեկանքի կամ գործի համար պետք ա կրկնակի ավել ծախս անեն, որ կարողանան Գորիս հասնեն», – ասաց Օնիկ Ավագյանը։
Նախկինում նաև երկու օրը մեկ երթուղային էր աշխատում, որով բնակիչները կարողանում էին Գորիս հասնել, հիմա նաև այդ հնարավորությունից զրկվեցին, ընդգծում է վարչական ղեկավարը։
Սաթենիկ Հայրապետյան
