25.04.2024 | 00:15
Ոստիկանությունը բերման է ենթարկում ԱԺԲ երթի մասնակիցներին. ՏԵՍԱՆՅՈՒԹ
Բայրամովը հայտարարել է, որ UNESCO-ի` Արցախ այցի հետ կապված մի շարք բարդ հարցեր համաձայնեցվել են
Քաղաքականություն
11.11.2021 | 15:19
Ադրբեջանն ու UNESCO-ն ակտիվ երկխոսություն են վարում՝ կազմակերպության տեխնիկական առաքելության այցն Արցախ կազմակերպելու համար։ Այս մասին հայտարարել է Ադրբեջանի ԱԳ նախարար Ջեյհուն Բայրամովը UNESCO-ի գլխավոր համաժողովի 41-րդ նստաշրջանի ընդհանուր քաղաքականության մասին քննարկումների ժամանակ ունեցած ելույթում, գրում են ադրբեջանական լրատվամիջոցները։
«Ադրբեջանը ցանկանում է համագործակցել UNESCO-ի հետ հետկոնֆլիկտային վերականգնման գործընթացում։ Հակամարտության ավարտից հետո Ադրբեջանն ու UNESCO-ն ակտիվ երկխոսություն են իրականացնում՝ «ազատագրված տարածքներ» տեխնիկական առաքելության կազմակերպման համար։ Կողմերը համաձայնության են հասել մի շարք բարդ տեխնիկական, իրավական ու քաղաքական հարցերում, որոնք կապահովեն առաքելության արդյունավետությունն ու անկախությունը»,- ասել է Բայրամովը։
Նա նշել է, որ «Ադրբեջանի մշակութային ժառանգությանը հասցված վնասի գնահատումն առաջնահերթություն է կառավարության համար» և կրկին մեղադրել Հայաստանին։
«Մենք պատրաստ ենք հնարավորինս շուտ ընդունել անկախ տեխնիկական առաքելությունը։ Ցավոք, Հայաստանը փորձում է խանգարել ու քաղաքականացնել առաքելության այցը, որը խաթարում է դրա հաջող իրականացումը։ Հայաստանը չպետք է խառնվի այդ գործընթացին և պետք է վերջ դնի կազմակերպության օգտագործմանն իր քաղաքական նպատակների համար»,- ասել է Ջեյհուն Բայրամովը՝ այլ անհիմն մեղադրանքներ ևս հնչեցնելով Հայաստանի հասցեին։
Հավելենք, որ Ադրբեջանը 2020 թվականի նոյեմբերի 9-ի հրադադարի եռակողմ հայտարարությունից հետո ամեն ինչ անում է՝ թույլ չտալու UNESCO-ի առաքելության մուտքն Արցախի գրավյալ տարածքներ։ ԵԱՀԿ Մինսկի խմբի համանախագահ պետությունները ևս հայտարարություններ են արել հայկական մշակութային ժառանգության պահպանման անհրաժեշտության և այդ աշխատանքներում UNESCO-ի ներգրավման մասին, որը մերժում է պաշտոնական Բաքուն՝ շարունակելով տարբեր մեղադրանքներ հնչեցնել Հայաստանի ու կազմակերպության հասցեին։
Շուրջ մեկ տարի է՝ Ադրբեջանի իշխանությունները շարունակում են տարբեր պայմաններ առաջադրել կազմակերպությանը։ Ադրբեջանի բարձրաստիճան պաշտոնյաները՝ նախագահ Իլհամ Ալիևը, ԱԳ նախարար Ջեյհուն Բայրամովը և այլք, սեփական ապակառուցական գործողությունները քողարկելու համար առաքելության այցը խաթարելու մեջ մեղադրում են Հայաստանին, սակայն կազմակերպությունն իր հերթին հասցեական հայտարարությամբ հերքել է այս ամենը։ Մասնավորապես, դեկտեմբերին կազմակերպության մշակույթի հարցերով գլխավոր տնօրենի տեղակալ Էռնեստո Օտտոնեն հայտարարել էր, որ Ադրբեջանից դեռ պատասխան չեն ստացել Արցախ կազմակերպության փորձագիտական առաքելություն ուղարկելու համար։
«Առայժմ միայն Ադրբեջանի պատասխանին ենք սպասում, որպեսզի UNESCO-ն կարողանա առաջ շարժվել առաքելություն ուղարկելու ուղղությամբ»,- ասել էր նա։
Ադրբեջանը ժամանակ առ ժամանակ հայտարարում է կազմակերպության առաքելության շուրջ պայմանավորվածության ձեռքբերման մասին, սակայն արդյունքում այն այդպես էլ չի կայանում։ Չի բացառվում, որ Բայրամովի այս հայտարարությունը ևս նմանների շարքից է։
Մասնավորապես, միայն մայիս–հունիս ամիսներին էր ադրբեջանական կողմից կազմակերպության Արցախ այցի շուրջ ավելի դրական տեղաշարժ նկատվում։ Ալիևը հայտարարել էր, թե UNESCO-ի հետ քննարկումներ են անցկացնում ու դրանք գտնվում են առաքելության ժամանման բանակցությունների վերջին փուլում, ինչից հետո՝ հունիսի վերջին, Ադրբեջանի ԱԳՆ մամուլի ծառայության ղեկավար Լեյլա Աբդուլլաևան էր հաղորդել, որ Բաքուն և UNESCO-ն քննարկում են Արցախի գրավյալ տարածքներ կառույցի առաքելության կազմակերպման հարցը։ Խոսքը Ակնայի (Աղդամ), Վարանդայի (Ֆիզուլի) շրջանների և Շուշիի մասին է։
Սակայն այս հայտարարություններից կարճ ժամանակ անց Բաքուն կրկին սկսեց ագրեսիվ հռետորաբանությամբ ու գործողություններով ապացուցել, որ ամեն կերպ փորձում է անհնարին դարձնել ու խոչընդոտել կազմակերպության առաքելության մուտքն Արցախ։
Էմմա Չոբանյան
