14.01.2026 | 15:29
Քաղաքապետարանը չի բացահայտում՝ ում միջև և ինչ չափով է բաշխվել 634 մլն դրամի պարգևավճարը
ԵՄ-ն կոչ է արել անհապաղ ազատ արձակել 44-օրյա պատերազմի բոլոր ռազմագերիներին
Քաղաքականություն
11.11.2021 | 11:19
Եվրամիության արտաքին գործերի և անվտանգության քաղաքականության խոսնակ Պետեր Ստանոն հայտարարությամբ է հանդես եկել Լեռնային Ղարաբաղի 44-օրյա պատերազմը դադարեցնելու նպատակով Հայաստանի, Ադրբեջանի և Ռուսաստանի միջև կնքված եռակողմ համաձայնության 1-ամյակի առնչությամբ: Հայտարարության մեջ մասնավորապես ասված է․
«Այս շաբաթ լրանում է Հայաստանի և Ադրբեջանի միջև ստորագրված զինադադարի համաձայնագրից հետո Լեռնային Ղարաբաղում և նրա շուրջ ռազմական գործողությունների դադարեցման առաջին տարին։
ԵՄ-ն ցավում է այս մարտական գործողությունների ընթացքում պատճառված մարդկային կորուստների համար և իր ցավակցությունն է հայտնում զոհվածների ու վիրավորների ընտանիքներին։ Թեև ռազմական գործողությունները դադարեցվել են, սակայն շատ առկախ հարցեր դեռ պետք է լուծվեն՝ բանակցային, համապարփակ և կայուն կարգավորմանը հասնելու համար: Մենք, մասնավորապես, կոչ ենք անում խստորեն հարգել հրադադարի ռեժիմը, անհապաղ ազատ արձակել բոլոր մնացած գերիներին, ականազերծման հարցում լիակատար համագործակցություն ցուցաբերել և սահմանամերձ շրջաններում թուլացնել լարվածությունը։
Եվրամիությունը շարունակում է հանձնառու մնալ՝ խթանելու խաղաղությունն ու բարգավաճումը Հարավային Կովկասում, և այն ակտիվորեն ներգրավված է խաղաղաշինությանն ու հակամարտությանը հաջորդող վերականգնմանը նպաստելու գործընթացներում: Այն կարևոր դերակատարում է ունեցել գերիների ազատ արձակման և ականապատ տարածքների քարտեզները տալու գործում։
ԵՄ-ն նաև իր աջակցությունն է ցուցաբերել հակամարտությունից տուժած մարդկանց՝ տրամադրելով ավելի քան 17 միլիոն եվրո մարդասիրական օգնություն, ներառյալ ականազերծման և շուտափույթ վերակառուցման համար: ԵՄ-ն պատրաստ է նաև աջակցելու սահմանային լարվածության թուլացմանն ու դելիմիտացիային՝ տրամադրելով անհրաժեշտ տեխնիկական օգնություն, և խրախուսում է Հարավային Կովկասում տնտեսական համագործակցության վերսկսումը:
Նայելով առաջ՝ համապարփակ կարգավորումն անհրաժեշտ է՝ վերջ դնելու ավելի քան երեք տասնամյակ տևած հակամարտությանն ու տառապանքներին: Այս նպատակին հասնելու համար ԵՄ-ն կշարունակի ակտիվ կապի մեջ լինել համապատասխան միջազգային գործընկերների, մասնավորապես՝ ԵԱՀԿ Մինսկի խմբի համանախագահների հետ և լիովին աջակցում է նրանց՝ իրենց մանդատը իրականացնելու հարցում՝ աշխատելով Հայաստանի և Ադրբեջանի հետ՝ բոլոր առաջնահերթ խնդիրների համապարփակ լուծման ուղղությամբ»,- ասված է Պետեր Ստանոյի հայտարարության մեջ։
Տաթև Ֆռանգյան
