Թուրքիայի ՊՆ ղեկավարը Հայաստանին կոչ է արել «մոռանալ թշնամանքն» ու միանալ «տարածաշրջանային համագործակցության «3+3» ձևաչափին»

Թուրքիան կոչ է անում Հայաստանին՝ «հրաժարվել թշնամական քաղաքականությունից և միանալ տարածաշրջանային համագործակցության «3+3» ձևաչափին»։ Այս մասին Բաքվում հայտարարել է Թուրքիայի պաշտպանության նախարար Հուլուսի Աքարը, գրում են տեղական լրատվամիջոցները։

«Ադրեջանի և Թուրքիայի նախագահները դրսևորել են շատ կառուցողական մոտեցում՝ ուղղված ապագա սերունդների համար խաղաղ կյանքի ստեղծմանը, և բացել են նոր դարաշրջանի դուռը՝ հիմնված կայունության և համագործակցության վրա։ Մենք ակնկալում ենք, որ հայ պաշտոնյաները, հրաժարվելով ներկա քաղաքականությունից, կօգտագործեն պատմական այս հնարավորությունը, այդ թվում՝ «3+3» հարթակի մեր առաջարկի»,- ասել է Հուլուսի Աքարը։

Նա նշել է, որ Արցախյան երկրորդ պատերազմում Ադրբեջանը հաղթել է, սակայն նոր պայքար է սկսվել Կովկասում կայուն խաղաղության ապահովման համար։

«Այդ կապակցությամբ «Շուշիի հռչակագիրը» ուժեղ քայլ է դեպի ապագա։ Բոլորը պետք է իմանան, որ ապագան չի կարող կառուցվել ատելության ու  քինախնդրության վրա։ Հայաստանը  պետք է դադարեցնի թշնամանքն ու նայի ապագային։ Մենք մեր կողմից կշարունակենք տարածաշրջանում խաղաղության, կայունության ու հանգստության ապահովման ուղղությամբ ջանքերը»,- ասել է Թուրքիայի ՊՆ ղեկավարը։

Աքարը նաև շնորհակալություն է հայտնել Պակիստանին՝ պատերազմում Ադրբեջանին աջակցելու համար։

Հավելենք, որ Թուրքիայի պաշտպանական գերատեսչության ղեկավարի գլխավորած պատվիրակությունը նախօրեին է ժամանել Բաքու։ Աքարին ուղեկցում են գլխավոր շտաբի պետ Յաշար Գյուլերը, տարբեր տեսակի զորքերի հրամանատարները։

Էմմա Չոբանյան