Պատվաստման կեղծ հավաստագիր գնածը վաղը կմահանա, կասեն՝ պատվաստված էր, բայց մահացավ. Պապոյանը՝ նախարարին․ ՏԵՍԱՆՅՈՒԹ

«Պատվաստման կեղծ հավաստագիր գնածը վաղը կմահանա, կասեն՝ պատվաստված էր»,- այս մասին ԱԺ առողջապահության ու Ֆինանսավարկային և բյուջետային հարցերի մշտական հանձնաժողովների համատեղ նիստի ընթացքում դիմելով ՀՀ առողջապահության նախարար Անահիտ Ավանեսյանին, նշեց քաղաքացիական պայմանագիր խմբակցության պատգամավոր Գևորգ Պապոյանը:

«Վստահաբար չեմ կարող ասել, որ բոլոր դեպքերն են բացահայտվել և այս արատավոր երևույթն առկա է բոլոր երկրներում»,- նշեց առողջապահության նախարար Անահիտ Ավանեսյանն՝ անդրադառնալով իրավապահների կողմից պատվաստման կեղծ վկայականների վաճառքի դեպքերի բացահայտմանը:

Նրա խոսքով, Առողջապահության նախարարությունը ռետրոսպեկտիվ միջոցներ չունի՝ պարզելու համար, թե կովիդից մահացածը պատվաստման սերտիֆիկատը ձեռք է բերել առանց պատվաստվելու, թե իրոք պատվաստված է եղել, և դա հարցեր կառաջացնի պատվաստման արդյունավետության վստահության հետ կապված:

«Իրավապահները պետք է շարունակեն կանխարգելիչ միջոցներ իրականացնել և խստորեն արձագանքել՝ նման դեպքերը բացահայտելով։ Վատ եմ ինձ զգում ասելու, բայց՝ նաև խստորեն արձագանքելով, որովհետև, նման արարքը վտանգում է ոչ միայն տվյալ անձի կյանքին ու առողջությունը, այլնաև հանրային առողջությանը»,- ընդգծեց Ավանեսյանը:

Նախարարը խոստացավ, որ առաջիկա շաբաթվա ընթացքում ամփոփելով նախորդ ժամանակահատվածում պատվաստվածների շրջանում մահերի թվերը, կհամադրեն դրանք և կհրապարակեն վիճակագրությունը:

Մանրամասները՝ տեսանյութում: