Չեմ փոշմանել, որ գլխավորել եմ ՔՊ-ի ցուցակը․ Շիրակի հեռացող մարզպետի հրաժեշտի ասուլիսը. ՏԵՍԱՆՅՈՒԹ

Այսօր Շիրակի մարզպետի պաշտոնից հրաժարական ներկայացրած Հովհաննես Հարությունյանը մամուլի ասուլիս էր հրավիրել։

Խոսելով հրաժարական ներկայացնելու պատճառի մասին, նա ասաց․ «Երբ որոշվեց՝ ես պիտի գլխավորեմ «Քաղաքացիական պայմանագիր» կուսակցության ավագանու ցուցակը, այդ պահից պարզ էր, որ անկախ նրանից՝ ընտրություններն ինչ ելք կունենան, ես այլևս չեմ զբաղեցնելու Շիրակի մարզպետի պաշտոնը։ Այն, ինչ այսօր տեղի ունեցավ, այդ որոշման տրամաբանական շարունակությունն է։ Դա որպես պատճառ»։

Հարցին՝ հրաժարական ներկայացնելու պարտադրանք չի՞ եղել, Հովհաննես Հարությունյանն ասաց․ «Պարտադրանքի մասին խոսք լինել չի կարող, որովհետև ի պատիվ «Քաղաքացիական պայմանագիր» կուսակցության ղեկավարության՝ գործընկերային թափանցիկ աշխատելաոճ է որդեգրվել։ Կարծում եմ՝ բոլորիդ համար էլ պարզ է, որ նման երևույթ լինել չէր կարող։

Ես իմ աշխատանքային գործունեության ընթացքում չեմ տեսել պարտադրանք, որի համար ես շատ շնորհակալ եմ, որոշումների մեջ ինձ ազատ են թողել, տարբեր համանգամանքներով պարտադրանք ներկայացնել, այդպիսի բաներ գոյություն չեն ունեցել։ Շնորհակալ եմ, որ իմ դիմումը չի մերժվել, որովհետև, նորից եմ կրկնում, այն պահից սկսած, երբ որոշվեց «Քաղաքացիական պայմանագիր» կուսակցության ավագանու ցուցակը գլխավորել, այդ պահից պարզ էր, որ ես այլևս մարզպետի պաշտոնը չեմ զբաղեցնելու»։

Շիրակի նախկին մարզպետն ասաց՝ դեռ քննարկումների մեջ է, թե հետագայում ինչ աշխատանքի կանցնի։

Արմիկ Մովսիսյան