Քաղաքականություն
29.10.2021 | 16:40Վարչապետ Նիկոլ Փաշինյանը երեկ խորհրդարանում հայտարարեց, որ ինքն է հրաման տվել Վաղարշակ Հարությունյանին, որ Սյունիքի սահմաններից զորքերը հետ քաշվեն: Արդյո՞ք դա եղել է ճշգրիտ որոշում: Factor.am-ի հետ զրույցում անդրադառնալով այս հարցին՝ «Պատիվ ունեմ» խմբակցության պատգամավոր Տիգրան Աբրահամյանը նշեց. «Նախ՝ ստում են բոլոր այն իշխանական քաղաքական գործիչները, ովքեր փորձում են ներկայացնել, որ դեկտեմբերին Սանասարի և Կովսականի հանձնումը բխում էր նոյեմբերի 9-ի փաստաթղթից, դա լիակատար ապատեղեկատվություն է:
Ինչ վերաբերում է Նիկոլ Փաշինյանի այն պարզաբանումներին, թե եղել է բանավոր փոխըմբռնում, և եղել է պատերազմի վտանգ, որի արդյունքում ինքը համաձայնել է այդ քայլին գնալ, նախ՝ խնդիրն իրավական հիմքն է. ի՞նչն է իրեն թույլ տվել հանձնել տարածքներ, որոնք Արցախի Հանրապետության Սահմանադրությամբ ամրագրված շրջաններ են եղել, և երկրորդ՝ եթե ընդունենք այն պատճառաբանությունը, թե եղել է պատերազմի սպառնալիք, ապա Ադրբեջանն այս փուլում էլ Թուրքիայի աջակցությամբ կարող է հավակնություններ ներկայացնել տարբեր բնակավայրերի նկատմամբ, և իշխանությունը ցանկացած պարագայում իր զիջումն արդարացնի որպես պատերազմի սպառնալիքից դուրս գալու գործընթացի ելք: Բայց եթե այսպիսի տրամաբանությամբ շարժվենք, ապա ոչ միայն Արցախի՝ մեր վերահսկողության տակ գտնվող հատվածը կկորցնենք, այլ կկորցնենք Հայաստանը: Այսպիսի տրամաբանություն որևէ իշխանության պարագայում չպետք է գործի»,- նշեց Աբրահամյանը:
Նրա խոսքով՝ իշխանությունն ամեն ինչ անում է իրավիճակը «խաղաղություն կամ պատերազմ» դիլեմայի մեջ տեղավորելու համար. «Փորձում են հանրությանը համոզել, որ խորհրդարանական ընդդիմության նապատակը նոր պատերազմն է: Սա սրիկայություն է: Մենք ասում ենք, որ Նիկոլ Փաշինյանի այս թվացյալ խաղաղության գործընթացը կա՛մ բերելու է շատ ավելի մեծ, ավերիչ պատերազմի, կա՛մ ՀՀ-ի պետականության վերջնական կորստի:
Մեր մտահոգություններն ուղղված են իրավիճակը կայունացնելուն և երկարատև խաղաղություն բերելուն»:
Մանրամասները՝ տեսանյութում:
