Պաշտոնեական լիազորությունների չարաշահման մեջ մեղադրվող Վանաձորի նախկին քաղաքապետի գործը դատարանում է

Լոռու մարզի Վանաձոր քաղաքի նախկին քաղաքապետ Սամվել Դարբինյանի գործը վարույթ է ընդունվել․ այն կքննի ՀՀ Լոռու մարզի առաջին ատյանի ընդհանուր իրավասության դատարանի դատավոր Մուշեղ Հարությունյանը։ Այս մասին Factor.am-ը տեղեկանում է «Դատալեքս» դատական տեղեկատվական համակարգից։

1999-2016 թվականների ընթացքում Վանաձոր համայնքի ղեկավարի պաշտոնը զբաղեցնող Դարբինյանին մեղադրանք է առաջադրվել այն բանի համար, որ նա, հանդիսանալով պաշտոնատար անձ, անձնական այլ շահագրգռվածությունից ելնելով, իր պաշտոնեական դիրքը ծառայության շահերին հակառակ օգտագործելով, 2003թ. կազմակերպել է Վանաձոր քաղաքի Տիգրան Մեծ հասցեի 1.900 քմ մակերեսով տարածքը վարձակալությամբ տրամադրելու մրցույթ, որին մասնակցել և հաղթող է ճանաչվել մրցույթին մասնակցության իրավունք չունեցող նրա եղբայրը. տարածքը վարձակալությամբ տրամադրվել է վերջինիս ՍՊ ընկերությանը, որի արդյունքում համայնքին պատճառվել է առանձնապես խոշոր չափերով վնաս:

Բացի այդ, 2004թ. փետրվարի 16-ին, 3.845.400 ՀՀ դրամ կադաստրային արժեք ունեցող Վանաձոր քաղաքի Տիգրան Մեծի հասցեում գտնվող 850.0 քմ մակերեսով կառույցը 371.620 ՀՀ դրամի դիմաց գրանցվել է որպես որդու սեփականության իրավունք, արդյունքում համայնքին պատճառվել է առանձնապես խոշոր չափերով վնաս:

Քննությամբ պարզվել է, որ 2002-2006 թթ. ընթացքում համայնքի ղեկավարը նույն քաղաքի տարբեր հասցեներում գտնվող՝ տարբեր մակերեսներով տարածքները գրանցել է որպես իր հարազատների սեփականություն, որի հետևանքով համայնքին պատճառվել է շուրջ 60 մլն դրամի վնաս:

Ձեռք բերված բավարար ապացույցների համակցությամբ՝ Վանաձոր համայնքի ղեկավարին մեղադրանք է առաջադրվել՝ ՀՀ քրեական օրենսգրքի 308-րդ հոդվածի 2-րդ մասով /4 դրվագ/, 308-րդ հոդվածի 1-ին մասով և 314-րդ հոդվածի 1-ին մասով: Որպես խափանման միջոց ընտրվել է ստորագրություն չհեռանալու մասին։

Նշենք, որ Սամվել Դարբինյանի որդին՝ Աղասի Դարբինյանը, 2018-ին նախագահի հրամանագրով 3 տարի ժամկետով նշանակվել էր ՀՀ վարչական դատարանի նախագահի պաշտոնը, իսկ այժմ Վարչական դատարանի դատավոր է։

Ռոզա Վարդանյան