Փաշինյանը գնում է հատուկ հակահայ բան անելո՞ւ, աբսուրդ է. Լուսինե Բադալյանը՝ հնարավոր փաստաթղթի ընդունման մասին. ՏԵՍԱՆՅՈՒԹ

Վերջին օրերին հանրության շրջանում բուռն կերպով քննարկվում է մամուլում շրջանառվող այն տեղեկությունը, որ նոյեմբերի 9-ին Ռուսաստանի միջնորդությամբ Հայաստանի և Ադրբեջանի ղեկավարները ևս մեկ փաստաթուղթ պետք է ստորագրեն: Հնչում են կարծիքներ, որ հնարավոր է այդ փաստաթղթով Հայաստանը և Ադրբեջանը ճանաչեն միմյանց տարածքային ամբողջականությունը:

Արդյո՞ք հակահայ փաստաթուղթ չի լինի սեղանին: «Factor.am-ի հետ զրույցում անդրադառնալով այս հարցին՝ «Քաղաքացիական պայմանագիր» խմբակցության պատգամավոր Լուսինե Բադալյանը նշեց. «Ես չէի ցանկանա զբաղվել կանխագուշակություններով, քանի որ չունեմ տեղեկություն, թե ինչ է քննարկվում և ինչ է քննարկվելու, հետևաբար ինչ էլ ասեմ, լինելու է ենթադրություն:

Բայց կարող եմ երաշխավորել մի բան, որ ի հեճուկս տարբեր կարծիքների կամ ընդդիմության անընդհատ բարձրաձայնած որակումների կամ ածականների, որ տրվում են ՀՀ վարչապետին կամ նրա թիմի ցանկացած անդամի, հանգիստ եմ՝ իմանալով, որ անկախ նրանից, թե ինչ կքննարկվի, եթե նույնիսկ մի փոքր, մի բջջի չափով անգամ հնարավորություն լինի հայանպաստ ինչ-որ բան անելու, ապա կարվի՝ ի դեմս թե՛ Նիկոլ Փաշինյանի, թե՛ մեր քաղաքական թիմի: Իսկ թե ինչպես կստացվի, դժվարանում եմ ասել: Պատերազմն էլ, որևիցե մեկը չէր կարծում, որ այսպիսի ավարտ է ունենալու, պայքարում էինք մի բանի համար, բայց արդյունքում ստացվեց մեկ ուրիշ բան: Բայց կարող եմ երաշխավորել, որ հաստատ ամեն ինչ արվելու է, որ հայանպաստ լուծում լինի»:

Անդրադառնալով ընդդիմության պնդումներին, որ ամեն ինչ անելու են հակահայ փաստաթղթի ստորագրումը կանխելու համար, Բադալյանը նշեց. «Բացի այն, որ դա շատ վիրավորական է, նաև աբսուրդային է: Ի՞նչը կանխելու համար: Նիկոլ Փաշինյանը գնում է հատուկ հակահայ բան անելո՞ւ, և ընդդիմությունն էլ, որպես փրկիչ, պատրաստվում է դա կանխե՞լ: Սա ուղղակի հերյուրանք է, անհեթեթություն է»:

Մանրամասները՝ տեսանյութում: