Հասարակություն
22.10.2021 | 17:58Սադախլո-Բագրատաշեն անցկակետում բեռնատարների հերթ է գոյացել։ Վարորդները տևական ժամանակ սպասում են՝ Հայաստան մուտք գործելու համար։ Այսօր նման ահազանգով Factor.am-ին է դիմել հերթում սպասող վարորդներից մեկը։
«Երեկ ժամը 10-ից սպասում եմ, անցակետում եմ եղել, մինչև հիմա սպասում եմ։ Ինձնից առաջ եկած մարդիկ էլ կան, սպասում են։ Մեր կայանատեղիում մոտ 60 մեքենա կա, ու նման ևս երկու կայանատեղիում սպասողներ կան»,- նշեց բեռնատարի վարորդը։
Ահազանգի վերաբերյալ պարզաբանում խնդրեցինք ՊԵԿ-ից․
«Մեզ մոտ խնդիր չկա։ Բեռնատարները համապատասխան ստուգումներ են անցնում՝ պարտադիր ռենտգեն-զննություն, դա միշտ եղել է ու ժամանակատար պրոցես է, բայց բնականոն պրոցես է»,- նշեց ՀՀ ՊԵԿ տեղեկատվության և հասարակայնության հետ կապերի բաժնի պետ Լուսինե Մկրտչյանը։
Վերջինիս խոսքով՝ այնուամենայնիվ, բեռնատարների հոսքն ավելացել է։
«Հիմա օրվա կտրվածքով 300-ից ավելի մեքենա է մուտք գործում Բագրատաշեն։ Հոկտեմբերի 1-ի համեմատ՝ հոսքն ավելացել է 15-20 %-ով»։
Վրաստանի սահմանին ստեղծված իրավիճակի հետ կապված կապ հաստատեցինք նաև ՌԴ-ում ՀՀ դեսպանությանը կից մաքսային կցորդ Արամ Թանանյանի հետ։
Վերջինս տեղեկացրեց, որ այս պահին շուրջ 80 մեքենա կա, սակայն դա կուտակում համարել չի կարելի․
«Վրացական կողմում խնդիր չկա։ 80 մեքենա է կանգնած Սադախլոում, 130 տեղ ազատ է։ Մինչև 200 մեքենան դա ընդհանրապես խնդիր չէ։ 1 օրվա ընթացքում անցնում է»,- նշեց Թանանյանը։
Նշենք, որ ահազանգի հեղինակը նաև տեսանյութ և լուսանկար է տրամադրել, որում երևում է հերթի մեջ կանգնած սպասող բեռնատարների շարքը։
Անժելա Պողոսյան
