15.12.2024 | 14:24
Սոթքում 2022-ի ռազմական ագրեսիայից հետո բնակիչներին են հանձնվել նորակառույցների բանալիները. ՏԵՍԱՆՅՈՒԹ
Ապամոնտաժում ուժի կիրառմամբ ու անչափահասների աչքի առաջ․ 5-ամյա երեխային փսխումներով հիվանդանոց են տարել․ ՏԵՍԱՆՅՈւԹ
Հասարակություն
14.10.2021 | 21:08
Անչափահաս 3 երեխաների լացով ուղեկցվող այս տեսանյութը երեկ հայտնվեց համացանցում․ պարզվեց՝ միջադեպը տեղի է ունեցել երեկ, Երևանի Մալաթիա-Սեբաստիա վարչական շրջանում, հերթական ինքնակամ կառույցի ապամոնտաժման ժամանակ։ Factor.TV-ի նկարահանող խումբն այսօր գնաց միջադեպի հետքերով։ Ընտանիքի անդամներին առավոտյան Ծերեթելի մանկական հիվանդանոցի բակում գտանք։ Երեխաներից ամենափոքրը՝ 5-ամյա տղան, երեկվա միջադեպից հետո ամբողջ գիշեր փսխել էր, առավոտյան շտապօգնության մեքենայով հիվանդանոց էին տեղափոխել։
Երեխայի մոտ նման վիճակ ստեղծվել է սթրեսից՝ ասել են բժիշկները, իսկ ընտանիքի միջնեկ դուստրը թե՛ երեկ, դեպքի պահին, թե՛ գիշերը անմիզապահություն է ունեցել։ Երեխաների հետ նաև հոգեբանը կաշխատի․ վախեցած են շատ, ասում է մայրը։
Վերադառնալով ապամոնտաժմանը։ Մալաթիա-Սեբաստիա համայնքի Կուրղինյան 3/15 հասցեում, Վազգեն Ռաֆայելյանը, 4 տարի առաջ ավտոսպասարկման կետ է կառուցել, իսկ 1 տարի առաջ հարակից տարածքում նաև մեկ այլ շինություն է կառուցել՝ ավտոպահեստամասերը պահելու համար, որոնք քանդման ընթացքում ամբողջությամբ վնասվել են։
Ապամոնտաժումն իրականացվել է օրենքի կոպիտ խախտումներով՝ պնդում է Վազգենի շահերը ներկայացնող փաստաբան Հասմիկ Մարտիրոսյանը։ Ինքը հենց երեկ է տեղեկացվել քանդման որոշման մասին, որոշման համարով որոնել է քաղաքապետարանի կայքում և չի գտել որոշումը, բայց վերադասության բողոք է ներկայացրել՝ որոշումը չեղարկելու պահանջով։ Օրենքի համապատասխան դրույթի համաձայն, եթե վարչական ակտը վիճարկվում է, դրա գործողությունը կասեցվում է՝ ասում է փաստաբանը։
Քաղաքապետարանի աշխատակիցների փոխանցմամբ, Վազգենը դրսևորել է ագրեսիվ պահվածք, հայհոյել է իշխանության ներկայացուցիչներին և ապակիներ է կոտրել, որից հետո ոստիկանները ուժ են կիրառել, իսկ երեխաները, ըստ նրանց, տարածք են բերվել ոստիկանների ժամանելուց հետո։
Այս պահին Վազգենի փաստաբանը 3 հայց է ներկայացրել դատարան՝ անօրինական գործողությունների, քանդման որոշման ու ինքնակամ կառույցի օրինականացման վերաբերյալ։
Ոստիկանությունից տեղեկացրեցին, որ ոստիկանապետի հանձնարարությամբ Ներքին անվտանգության վարչությունում դեպքի առիթով ծառայողական քննություն է նշանակվել։ Գլխավոր դատախազի խորհրդական Գոռ Աբրահամյանն էլ տեղեկացնում է, որ տեսանյութն ուղարկվում է հատուկ քննչական ծառայություն՝ ՀՀ քրեական դատավարության օրենսգրքի 180-րդ և 181-րդ հոդվածներով սահմանված կարգով նյութեր նախապատրաստելու, քրեական վարույթի շրջանակներում տեսանյութում երևացող հանգամանքները, ինչպես նաև ոստիկանների գործողությունների իրավաչափությունը և համաչափությունը պարզելու, իրավական գնահատականներ տալու նպատակով:
Մինչ իրավապահ մարմինները կպարզեն իրողությունը, դեպքի առիթով իրենց մտահոգությունն են հայտնել իրավապաշտպանները։ Երեխաներին է այցելել նաև մարդու իրավունքների պաշտպան Արման Թաթոյանը։
Մանրամասները՝ տեսանյութում։
Սաթենիկ Հայրապետյան
