25.04.2026 | 18:02
Փաշինյանը ներկա է գտնվել Մալխաս և Ռոման Ամոյանների անվան նոր մարզադպրոցի հիմնարկեքի արարողությանը
Վրաստանը հայտնվել է անհարմար իրավիճակում, սակայն հարթակն անտեսելն էլ Թբիլիսիի համար կարող է թանկ արժենալ․ վրաց վերլուծաբանը՝ «3+3» ձևաչափի մասին
Քաղաքականություն
08.10.2021 | 19:45
Վրաստանը հայտնվել է անհարմար իրավիճակում: Factor.am-ի հետ զրույցում նման կարծիք հայտնեցց վրացական «Geocase» Մերձավոր Արևելքի ուսումնասիրությունների վերլուծական կենտրոնի տնօրեն Էմիլ Ավդալիանին՝ խոսելով ՌԴ արտգործնախարար Սերգեյ Լավրովի առաջարկած «3+3» ձևաչափի և այդտեղ վրացական կողմի հնարավոր ներգրավվածության մասին։
««3+3» նախաձեռնության շրջանակում Վրաստանը պետք է աշխատի Ռուսաստանի հետ, որը զբաղեցրել է իր տարածքի 20%-ը»,-ասաց նա՝ միաժամանակ նկատելով, որ իրատեսությունը, սակայն, թելադրում է, որ հարթակն անտեսելն էլ Թբիլիսիի համար կարող է թանկ արժենալ։
Հիշեցնենք, որ Ռուսաստանի և Իրանի ԱԳ նախարարները Մոսկվայում համատեղ մամուլի ասուլիսի ժամանակ հայտարարել էին բանակցային նոր՝ «3+3» ձևաչափի քննարկման մասին, որն իրենցից բացի՝ ներառելու է Հայաստանը, Ադրբեջանը, Թուրքիան և Վրաստանը:
ՌԴ ԱԳ նախարար Սերգեյ Լավրովը նշել էր՝ ձևաչափի շրջանակում քննարկվելու է տարածաշրջանում տնտեսական և տրանսպորտային ուղիների ապաշրջափակման հարցը՝ հավելելով, որ իրանական կողմը դրական վերաբերմունք է հայտնել գաղափարի վերաբերյալ:
Ըստ Էմիլ Ավդալիանիի՝ Արցախյան երկրորդ պատերազմից հետո Վրաստանը պետք է հարմարվի Հարավային Կովկասում աշխարհաքաղաքական իրավիճակի փոփոխության հետ:
«Նման փոփոխություններից մեկը տարածաշրջանում Արևմուտքի ազդեցության հարաբերական անկումն է: Հետևաբար, «3+3»-ի շրջանակում տարածաշրջանային ուժերի հետ համագործակցությանը խոչընդոտելը և դրանից հրաժարվելը կարող է արդյունավետ չլինել»,- ասաց նա։
Ավդալիանին մատնանշեց Վրաստանի արտգործնախարար Դավիթ Զալկալիանիի հայտարարությունը, որով, ըստ նրա, արտացոլվեց վրացական կողմի տրամադրվածությունը՝ այն, որ վրացական ներգրավվածության ինչ-որ տարբերակ կարելի է գտնել:
«Այնուամենայնիվ, կարծում եմ, որ համագործակցության մակարդակը սահմանափակ կլինի: Մնալու են էական խոչընդոտներ, որոնք կխանգարեն Թբիլիսիի լիարժեք ընդգրկմանը»,- ասաց նա՝ նշելով, որ Ռուսաստանի նկատմամբ անվստահությունը, ինչպես նաև Վրաստանի ներքաղաքական իրավիճակը նույնպես կարող են լինել արգելակող հանգամանքներ այս գործընթացում։
Վերլուծաբանի խոսքով՝ ընդդիմությունը կարող է հեշտությամբ օգտվել այդ նախաձեռնությունից, կօգտվի Վրաստանի կառավարության մասնակցությունը քննադատելու հնարավորությունից, եթե նման որոշում կայացվի:
«Թերևս, սա կարող է նույնիսկ փողոցային լուրջ բողոքի ցույցերի առիթ դառնալ»,- եզրափակեց Ավդալիանին։
Հռիփսիմե Հովհաննիսյան
