Քաղաքականություն
05.10.2021 | 20:12«Երևի Ռոբերտ Քոչարյանը տիրապետում է ծնկած բանակցելու արվեստին, որովհետև ծնկած բանակցում է նա, ով ժողովրդի քվեն չի ունեցել, իսկ Ռոբերտ Քոչարյանը երբեք ժողովրդի քվեով չի ընտրվել. ծնկները թուլանում են, երբ որ ժողովրդի քվեն բացակայում է»,- այս մասին Factor.am-ի հետ զրույցում նշեց ԱԺ Պաշտպանության և անվտանգային հարցերի մշտականա հանձնաժողովի նախագահ, «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ անդրադառնալով ՀՀ երկրորդ նախագահ Ռոբերտ Քոչարյանի օրերս արած հայտարարությանը, թե ծնկած բանակցել հնարավոր չէ:
Անդրադառնալով Ռոբերտ Քոչարյանի հայտարարությանը՝ «ՀՀ ղեկավարը ոչ թե բանակցությունների սուբյեկտ է, այլ վերածվել է օբյեկտի, և Հայաստանը ոչ թե բանակցող կողմ է, այլ սեղանին դրված հարց, որը քննարկվում է», Անդրանիկ Քոչարյանը նշեց. «Բանակցություններում բնականաբար Հայաստանը ոչ միայն իր խոսքն ասում է, այլ նաև իր խոսքը պահում է: Ուժեղ է այն իշխանությունը, որի թիկունքում ժողովուրդն է, իսկ Ռ. Քոչարյանի և Ս. Սարգսյանի թիկունքում երբեք ժողովուրդը չի եղել: Այս 21 տոկոսը, որ ընտրել է իրենց՝ նախկին պաշտոնյաներն են կամ իրենց ընտանիքի անդամները, որոնք կարոտել էին իշխանությանը և այսօր էլ, որպես խրամատավորներ, սպասարկում են Ռ. Քոչարյանի ճաշակն ու նպատակները»:
Դիտարկմանը, որ Ռոբերտ Քոչարյանը հայտարարել է նաև փողոցային պայքարի մասին, Անդրանիկ Քոչարյանն արձագանքեց. «Ռոբերտ Քոչարյանը փողոցո՞ւմ, դա իր պատվից ցածր է, նա կարող է հրահրել, որ դուք դուրս գաք փողոց, բայց եթե իր հետևից փողոց դուրս եկող լիներ, հիմա փողոցը փակած կլինեին և իրենց հնարավորությունը բաց չէին թողնի, բայց մարդ չկա դուրս եկող, և դա իրենք շատ լավ գիտեն: Իշխանության հենարանը քաղաքացին է, ժողովուրդն է, իսկ իրենք մոռացել են, որ ժողովուրդն իր ընտրությունը կատարել է: Դա չգիտակցելով՝ իրենք ԱԺ-ն դարձրել են հարվածային թատերաբեմ, խրամատներից անցան շշանետումների, հիմա էլ որոշել են անցնել պարտիզանական շարժումների: Այսպես թե այնպես ժողովուրդը սպասում է այն ծրագրի իրականացմանը, որը պետք է իրականացնի իր քվեն ստացած իշխանությունը»:
Մանրամասները՝ տեսանյութում:
