Հատուկ դպրոցները՝ իշխանությունների և տնօրենների համար ֆինանսական «հյութեղ պատառնե՞ր». ՏԵՍԱՆՅՈՒԹ

Հայաստանի Ազգային ժողովի կողմից 2014 թվականին ընդունվել է «Հանրակրթության մասին» օրենքում լրացումներ և փոփոխություններ կատարելու մասին» օրենքը, որով հիմք դրվեց հանրակրթության համակարգում համընդհանուր ներառական կրթության անցմանը: Օրենքի կիրարկումն ապահովելու նպատակով Հայաստանի կառավարության 2016 թվականի արձանագրային որոշմամբ հավանության է արժանացել «Համընդհանուր ներառական կրթության համակարգի ներդրման գործողությունների պլանը և ժամանակացույցը»:

Երևանի ավագանու «Ելք» խմբակցության անդամ Անահիտ Բախշյանը շեշտում է՝ ըստ օրենքի՝ 2018 թվականի սեպտեմբերից հերթը Երևանինն է. մայրաքաղաքը պետք է անցնի համընդհանուր ներառական կրթության, և առաջին քայլը, որ պետք է անի, հատուկ դպրոցները մանկավարժահոգեբանական ծառայության կենտրոնների վերակազմակերպելն է: Այդ պրոցեսը, սակայն, ուշանում է: Անահիտ Բախշյանն իր մտահոգությունը նամակի տեսքով հայտնել է կրթության և գիտության նախարար Լևոն Մկրտչյանին, ով իր պատասխան նամակում տեղեկացրել է, որ Երևանում մշակվում է համընդհանուր ներառական կրթության անցման ռազմավարություն, և այն կներկայացվի միջնաժամկետ ծախսային ծրագրի կազմում:

Կրթության և գիտության նախարարության հանրակրթության վարչության գլխավոր մասնագետ Անահիտ Մուրադյանը Factor.am-ի հետ զրույցում պարզաբանում է՝ Երևանում համընդհանուր ներառական կրթության անցումը նախատեսված է իրականացնել մինչև 2022 թվականը:

Անահիտ Բախշյանը Երևանում համընդհանուր ներառական կրթության անցմանը պատրաստ չլինելու վերաբերյալ իր բացատարությունն ունի: Նրա խոսքով՝ Երևանի ենթակայության հատուկ դպրոցների տնօրենները չեն ուզում, որ դպրոցները վերակազմակերպվեն մանկավարժահոգեբանական ծառայության կենտրոնների, քանի որ չեն ուզում իրենց ձեռքից բաց թողնել ֆինանսական «հյութեղ պատառը», որն իրենց ընձեռվում է ներկայիս կարգավիճակում։ Նա միաժամանակ բարձրացնում է հատուկ դպրոցներին առնչվող մեկ այլ խնդիր: Ավագանու անդամը վկայում է՝ Երևանում մտավոր թերզարգացում ունեցող երեխաների դպրոցներում սովորում են նման խնդիր չունեցողներ: Եվ քանի որ այդ աշակերտների թիվը ապահովում է համապատասխան ֆինանսավորում, դպրոցների տնօրեններին ձեռնտու է նրանց պահելը:

Անահիտ Բախշյանը նշում է, որ զարմանք է ապրել նախորդ տարվա նոյեմբերին հեռարձակված «Մտավոր թերզարգացում ունեցող երեխաների թիվ 6 հատուկ դպրոցի» մասին «Ես կամ» հաղորդումը դիտելուց հետո: Նա վկայում է՝ դպրոցի երեխաներից շատերը ոչ մի խնդիր չունեն։ Հաղորդումը դիտելուց հետո տիկին Բախշյանն այցելել է տվյալ դպրոց և հանդիպել տնօրենի հետ: Նա խնդրել է ցույց տալ երեխաների վկայագրերը։ Խնդրանքը կատարվել է։ Սակայն թե ինչ է գրված եզրակացություններում, տիկին Բախշյանին ցույց չեն տվել։

Factor.am-ը թեմայի շուրջ հեռախոսազրույց է ունեցել մտավոր թերզարգացում ունեցող երեխաների Երևանի թիվ 6 հատուկ դպրոցի տնօրեն Լիանա Արտաշեսյանի հետ: Նրան հարցրել ենք՝ ինչու տիկին Բախշյանին ցույց չի տվել եզրակացությունները։ Տնօրենը պատասխանել է, որ առանց մասնագետի եզրակացության երեխաները վկայագրեր ունենալ չէին կարող։ Անահիտ Բախշյանը իր մտահոգություններով նախորդ տարվա դեկտեմբերին դիմել է նաև Մարդու իրավունքների պաշտպան Արման Թաթոյանին, ով պատասխանել է, որ նախատեսվում է իրականացնել մոնիթորինգային այց Երևան քաղաքում, որի ընթացքում Պաշտպանի ներկայացուցիչները կայցելեն նշյալ հաստատություններ և խախտումներ հայտնաբերելու դեպքում սահմանված կարգով կիրականացվեն համապատասխան գործողություններ: Պաշտպանը տեղեկացրել է նաև, որ բարձրացված հարցի շուրջ շահագրգիռ կողմերի մասնակցությամբ կկազմակերպվի հատուկ քննարկում, որի մասին կտեղեկացվի: Մինչ այժմ, սակայն, ոչ մի քայլ չի արվել։

Մանրամասները՝ տեսանյութում։

Աննա Բաբաջանյան