Կորոնավիրուսի համավարակի առումով երկրում լարված իրավիճակ է, արդեն իսկ 20 բժշկական կենտրոններ ամբողջությամբ կամ մասամբ ծառայում են Covid-ով պացիենտների բուժմանը։ Այս մասին այսօր լրագրողների հետ ճեպազրույցում ասաց առողջապահության նախարար Անահիտ Ավանեսյանը։
«Արդեն 20 բժշկական կենտրոն է սպասարկում կորոնավիրուսով հիվանդների բուժմանը։ Այս շաբաթվա ընթացքում մարզային ևս 2 ԲԿ՝ Արտաշատի ԲԿ-ն, Գյումրու ինֆեկցիոն հիվանդանոցը ևս կանցնեն Covid-ով հիվանդներին սպասարկելուն։ Մենք տեսնում ենք, որ մեր մահճակալային ռեզերվները, կարելի է ասել, ամբողջությամբ արդեն մոբիլիզացվում են, որովհետև, ցավոք սրտի, դելտա շտամի առանձնահատկությունն է, որ ավելի շատ հոսպիտալացման կարիք ունենք և ավելի ծանր ու ծայրահեղ ծանր դեպքեր ունենք, քան թե նախորդ ալիքների ժամանակ ունեինք։ Ամեն հաջորդ ալիքի հետ այս միտումը նկատելի է ոչ միայն Հայաստանում, այլ նաև ամբողջ աշխարհում»,- ասաց նախարարը։
Ըստ Ավանեսյանի՝ հիվանդանոցներում բուժում են ստանում նաև անձինք, ովքեր պատվաստվել են կորոնավիրուսի դեմ։ Նրա խոսքով՝ սա համադրելի է այն իրավիճակի հետ, որը կա նաև այլ երկրներում, որտեղ պատվաստումների բարձր ցուցանիշներ կան. «Բայց պատվաստումները շատ լուրջ կանխարգելիչ նշանակություն ունեն և անգամներ նվազեցնում են ծանր, ծայրահեղ ծանր ընթացքով հիվանդանալու ռիսկերը և մահացության դեպքերը»:
Անդրադառնալով դիտարկմանը, որ նախկինում ՊՇՌ թեստերը 15 000 դրամ էին, իսկ հիմա` կրկնակի էժան, Ավանեսյանը պատասխանեց, որ գնային քաղաքականությունն ԱՆ լիազորությունների մեջ չի մտնում։ Նրա խոսքով` կան շուկայի օրենքներ, և դա գուցե կապված է հոկտեմբերի 1-ից ուժի մեջ մտնող իր հրամանի հետ։
Մանրամասները՝ տեսանյութում:
