19.11.2024 | 12:45
ՌԴ-ն ուկրաինական Սումիի մարզում ԱԹՍ-ով հանրակացարանի է հարվածել․ զոհեր և վիրավորներ կան
Անկախության 30-ամյակն արցունքոտ աչքերով․ որդեկորույս ծնողները տոնը նշել են Եռաբլուրում․ՏԵՍԱՆՅՈՒԹ
Հասարակություն
21.09.2021 | 22:02
Պատերազմից գրեթե մեկ տարի է անցել․ Եռաբլուրի բարձունքում ոչ խնկի հոտն է պակասել, ոչ լացի ձայնը։ 44-օրյա պատերազմի 3773 նահատակներից 889-ի աճյուններն Եռաբլուրում են ամփոփված։ Առիթներին ու առանց առիթ, հարազատներն ու անծանոթները գալիս են Եռաբլուր։ Անկախության տոնն էլ բացառություն չէ․ անկախությունը կյանքի գնով պահպանած հերոսների շիրիմներին ծաղիկներն ավելանում են րոպե առ րոպե։ Մինուճար որդուն՝ 18-ամյա Էդգարին, տիկին Շուշանիկը բանակ էր ճանապարհել պատերազմի մեկնարկից ընդամենը 2 ամիս առաջ։ Դեռ ականջների մեջ է տղայի ոգևորված ձայնը․ բանակում զենք էր ստացել՝ ծառայության էր անցնում, երազանքը կատարվում էր։ Արցունքոտ աչքերը տղայի նկարից չկտրելով՝ արձանագրում է․ այդքան սիրած համազգեստը հավերժ հագին մնաց։
Տիկին Նինան էլ միակ որդուն տվեց հայրենիքին։ 27-ամյա Արիստակեսին բանակ ճանապարհեց 2020-ի հոկտեմբերի 1-ին։ Անցյալ տարվա հոկտեմբերի 6-ին, ժամը 15,17 րոպեին է վերջին անգամ որդու ձայնը լսել, հաջորդ օրն արդեն մահվան լուրն է ստացել։ Հիմա որդու կարոտը միակ 6-ամյա թոռնուհուց է առնում, բայց միևնույնն է ցավը չի մեղմվում, ապրում է հիշողություններով։
Շիրիմների մոտով անցնելիս ամենատարբեր զրույցներ կարելի է լսել, ասում են՝ օգնում է, որ գեթ մի փոքր թեթևանան։ Երևանի բարձրադիր այս վայրում քաղաքին նայող եռագույններն ու փոսերը պատերազմից մեկ տարի անց էլ դեռ ավելանում են։ ԴՆԹ փորձաքննություն անցած 111 մարմիններ դեռ պետք է հուղարկավորվեն։ Իսկ տարբեր անկյուններից, թվում է թե, քեզ նայող հայացքները պարտադրում են ապրել՝ նաև իրենց չապրած կյանքերի փոխարեն։
Մանրամասները՝ տեսանյութում։
Սաթենիկ Հայրապետյան
