ԵՐԵՎԱՆԻ ԺԱՄԱՆԱԿՈՎ․ Անկախ Հայաստանում ծնված սերնդի համար գաղութատիրական ճնշումները խորթ են. իմ հույսն այդ սերունդն է. Վահրամ Մարտիրոսյան

«Այո, այսօր մեր երկիրը շատ ծանր վիճակում է, բայց երեսուն տարվա վայրիվերումներով հանդերձ մենք ապրել ենք «Երևանի ժամանակով»`սկսած 1988-ից: Տոնն իր տեղն ունի, սուգը, վիշտը` իր: Մենք պետք է բարձրացնենք մեր կենսունակությունը, մարտունակությունը, դրա ձևերից մեկն էլ տոնը նշելն է»,- Factor TV-ի հետ զրույցում նման տեսակետ է հայտնում գրող, կինոսցենարիստ Վահրամ Մարտիրոսյանը:

Նրա համոզմամբ` երկրի ամրությունն առաջին հերթին հանրության հոգեբանությունից է կախված. «Առաջին հերթին քաղաքացին պետք է լինի ամբողջությամբ անկախ, իսկ մենք 70 տարի շարունակ մեր պատմության` սովետական գրաքննության թույլտվությամբ մատուցված տարբերակն ենք ունեցել, և մեր հասարակության կեսն իր պատմությունը պատկերացնում է դրանից ելնելով, վերջին 30 տարում`քաղաքական կոնյուկտուրայից, իշխանության շահերից ելնելով. շեշտադրումները եղել են շատ շահադիտական»:

Վահրամ Մարտիրոսյանը մեծ հույսեր է կապում անկախ Հայաստանում ծնված սերնդի հետ. «Այդ սերնդի համար ենթակայությունը մեկ այլ պետությանը, գաղութատիրական ճնշումները խորթ են և անընդունելի. իմ հույսն առաջին հերթին այդ սերնդի հետ եմ կապում: Մենք պետք է կարողանանք ուժեղացնել այդ սերնդին համապատասխան կրթությամբ, մշակույթով, դիմադրության մշակույթ ներշնչելով»:

Մեր զրուցակցի խոսքով` անկախ Հայաստանում ծնված սերնդին պետք է ներշնչել, որ հայրենիքում ապրում են ոչ միայն այն ժամանակ, երբ ամեն բան այնտեղ լավ է, այլև երբ համընդհանուր երջանկության մեջ իր ներդրման կարիքը կա:
Մանրամասները` տեսանյութում:

Աննա Բաբաջանյան