Օնիկ Գասպարյանն ընդդեմ ՀՀ նախագահի և վարչապետի գործով վարույթը կարճվել է

Վարչական դատարանը կարճել է «ՀՀ ԶՈՒ Գլխավոր շտաբի նախկին պետ Օնիկ Գասպարյանն ընդդեմ ՀՀ նախագահ Արմեն Սարգսյանի և վարչապետ Նիկոլ Փաշինյանի» գործով վարույթը։ Այս մասին Factor.am-ը տեղեկանում է «Դատալեքս» Դատական տեղեկատվական համակարգից:

Օնիկ Գասպարյանը մարտի 10-ին հայցադիմում էր ներկայացրել՝ պահանջելով իրեն պաշտոնից ազատելու վերաբերյալ վարչապետի որոշումը և նախագահի հրամանագիրն առ ոչինչ ճանաչել։

Վարչական դատարանը՝ դատավոր Մհեր Պետրոսյանի նախագահությամբ, սակայն, որոշում է կայացրել կարճել վարույթը, պատճառաբանելով, որ հայցվոր Գասպարյանը հնարավորություն է ունեցել իր խախտված իրավունքը վերականգնել վիճարկման հայցի շրջանակներում: «Հետևաբար, հայցվոր կողմը չէր կարող Վարչական դատարան հայց ներկայացնել ՀՀ վարչական դատավարության օրենսգրքի 69-րդ հոդվածի 1-ին մասով նախատեսված ճանաչման հայցատեսակով»,- նշված է դատական ակտի եզրափակիչ մասում։

Հիշեցնենք, որ ՀՀ ԶՈՒ ԳՇ նախկին պետ Օնիկ Գասպարյանը երեք հայցադիմում էր ներկայացրել Վարչական դատարան՝ ընդդեմ նախագահ Արմեն Սարգսյանի և վարչապետ Նիկոլ Փաշինյանի՝ վիճարկելով իրեն՝ ԳՇ պետի պաշտոնից ազատելու որոշման իրավաչափությունը։

Գասպարյանի կողմից ներկայացված երեք հայցադիմումներից երկուսը դատարանն ի սկզբանե վերադարձրել էր, ապա Վերաքննիչ քրեական դատարանի կողմից սույն որոշումները բեկանելուց հետո հայցադիմումները վարույթ են ընդունվել, որոնցից մեկն այժմ գտնվում է դատավոր Ռուզաննա Ազրոյանի, մյուսը՝ դատավոր Ռաֆիկ Խանդանյանի վարույթում: Հետևաբար՝ դատարանը զուգահեռաբար երեք հայց իրար հետ չէր կարող քննել, այդ իսկ պատճառով Մհեր Պետրոսյանին մակարգրված վարույթը կարճվել է:

Ռոզա Վարդանյան