ՌԴ Չայկովսկու անվան մեծ սիմֆոնիկ նվագախումբը համերգով հանդես կգա Երևանում

ՀՀ մշակույթի նախարարության աջակցությամբ, «Երևանյան հեռանկարներ» միջազգային փառատոնի շրջանակում՝ ս. թ. hունիսի 15-ին` ժամը 19:30–ին, Արամ Խաչատրյան համերգասրահում տեղի կունենա Ռուսաստանի պետական ակադեմիական Պ. Ի. Չայկովսկու անվան մեծ սիմֆոնիկ նվագախմբի համերգը` Վլադիմիր Ֆեդոսեևի ղեկավարությամբ․ տեղեկացնում է ՀՀ մշակույթի նախարարության հասարակայնության հետ կապերի բաժինը։ 

Համերգի ընթացքում կհնչեն Պ. Ի. Չայկովսկու «Հինգերորդ սիմֆոնիան», Ա. Խաչատրյանի «Ջութակի կոնցերտը» և այլ ստեղծագործություններ: Մենակատար՝  երիտասարդ ջութակահար Դիանա Ադամյան:

Իննսունամյա պատմություն ունեցող այս հեղինակավոր նվագախումբը ղեկավարել են Լորին Մաազելը, Կուրտ Մազուրը, Եվգենի Մրավինսկին: Նվագախմբի հետ հանդես են եկել մենակատարներ Սվյատոսլավ Ռիխտերը, Դավիդ Օյստրախը, Լուչիանո Պավարոտին, Վիկտոր Տրետյակովը, Պինկաս Ցուկերմանը, Յուրի Բաշմետը, Դենիս Մացուևը, Բորիս Բերեզովսկին, Եվգենի Կիսինը, Մաքսիմ Վենգերովը, Վադիմ Ռեպինը և այլոք: 1974 թվականից ի վեր նվագախմբի գեղարվեստական ղեկավար և գլխավոր դիրիժորն է Վլադիմիր Ֆեդոսեևը:

1995-2004 Վլադիմիր Ֆեդոսեևը թվականներին հանդիսացել է Վիեննայի սիմֆոնիկ նվագախմբի գլխավոր դիրիժորը, Տոկիոյի ֆիլհարմոնիկ նվագախմբի առաջին հրավիրյալ դիրիժորը և շուրջ 10 տարի` Ցյուրիխի օպերայի և Ցյուրիխի «Տոնհալլե» նվագախմբի հրավիրյալ դիրիժորը:

Պ. Ի. Չայկովսկու ստեղծագործությունների լավագույն և խորաթափանց կատարումների համար 1993 թվականին նվագախմբին շնորհվել է կոմպոզիտորի անունը: Նվագախմբի նվագացանկը ահռելի է. հայտնի են Մոցարտի, Բեթհովենի, Չայկովսկու, Բրամսի, Մալերի և ժամանակակից կոմպոզիտորների ստեղծագործությունների մեկնաբանությունները: Խմբի ձայնասկավառակները թողարկվել են «Սոնի», «Ուորներ Քլասսիքս ենդ Զազզ», «Ֆիլիպս», «Մելոդիա» և այլ հեղինակավոր ընկերությունների կողմից: