Մտածեցինք` զենքի ձայն է. ինչ են պատմում ականատեսները մեքենայի պայթյունից. ՏԵՍԱՆՅՈւԹ

Ինչպես արդեն տեղեկացրել ենք, սեպտեմբերի 12-ին Բաշինջաղյան փողոցում «Nissan Versa» մակնիշի ավտոմեքենայում տեղի է ունեցել գազի բալոնի պայթյուն՝ հրդեհի բռնկմամբ։ Հրդեհը մարվել է տեղի ուժերով։ Մասամբ այրվել է ավտոմեքենայի բեռնախցիկի երեսպատումը և վնասվել ավտոմեքենան։ Վարորդը դաստակի շրջանում այրվածք է ստացել։ Տուժածին շտապօգնության աշխատակիցները տեղում ցուցաբերել են համապատասխան բուժօգնություն։

Բաշինջաղյան փողոցի բնակիչները Factor.tv-ին մանրամասներ են պատմել կատարվածից․

«Ես տանը ուժեղ պայթյունի ձայն լսեցի, բայց չիմացա, թե որտեղ էր։ Զանգեցի տղայիս, ասաց՝ մի՛ անհանգստացեք, ոչ մեկին բան չի պատահել։ Իհարկե, վախեցանք, մտածեցի մեր շենքում է»,- պատմում է թաղամասի բնակիչ Մարիամ Թումանյանը։

Բնակիչ Օֆիկ Սարգսյանն էլ նշում է՝ կարծել է, թե զենքի ձայն է․

«Մտածեցի՝ ինչ-որ մեկին խփեցին, թե ինչ եղավ։ Եկա, տեսա, որ ավտոմեքենան ջարդված էր, շտապօգնության մեքենա էր կանգնած, անգամ մի աղջիկ էր վատացել։ Տեսա, որ վարորդին հանեցին մեքենայից»։

Մարիամն էլ ասում է՝ լսել է, որ վարորդը հասցրել էր շուտ դուրս գալ մեքենայի պատուհանից, միայն մազերն էր վառվել։

«Մեքենան հասավ այստեղ, պայթեց ու բեռնախցիկում հրդեհ սկսվեց։ Ջուր լցրին, անգամ վաճառվող ջրերով էին հանգցնում կրակը, շտապօգնության երկու մեքենա եկավ, մի հրշեջ մեքենա, բայց արդեն հանգցրել էին կրակը։ Վարորդն ասում էր՝ նոր էր լիցքավորել մեքենան, հեղուկ գազով էր աշխատում։ Գազի հոտ է զգացել, բայց ծխախոտ է վառել, ինչից էլ պայթյուն է առաջացել»,- պատմում է բնակիչ Ալբերտ Գևորգյանը։

Մանրամասները՝ տեսանյութում։
Արփի Հակոբյան