14.01.2026 | 21:27
Թուրքիայի ընդդիմադիր ազգայնական կուսակցության ղեկավարը Պոլսի Հայոց պատրիարքարան է այցելել
Աղվան Հովսեփյանը 2 ամսով կալանավորվել է
Հասարակություն
08.09.2021 | 10:23
ՀՀ նախկին գլխավոր դատախազ, Քննչական կոմիտեի նախկին նախագահ Աղվան Հովսեփյանը կալանավորվել է։ Երևան քաղաքի ընդհանուր իրավասության դատարանի դատավոր Մնացական Մարտիրոսյանը երեկ գիշերը բավարարել է ՀՔԾ քննիչի միջնորդությունը և Հովսեփյանին կալանավորելու որոշում կայացրել։
Ինչպես Factor.am-ի հետ զրուցում նշեց պաշտպան Սասուն Ռաֆայելյանը՝ որոշումը պատրաստվում են բողոքարկել Վերաքննիչ քրեական դատարանում: «Դատարանը հրապարակել է որոշման միայն եզրափակիչ մասը, դեռ հիմքերին ծանոթ չենք, բայց հստակ կարող եմ ասել՝ բողոքարկման ենթակա է»,- նշեց Ռաֆայելյանը։
Ըստ պաշտպանի՝ Հովսեփյանը մեղադրանքը չի ընդունում։
Հիշեցնենք՝ երեկ Հատուկ քննչական ծառայությունը հաղորդագրություն էր տարածել, ըստ որի՝ Աղվան Հովսեփյանը, 2004 թվականի մարտի 18-ից մինչև 2013 թվականի սեպտեմբերի 13-ը զբաղեցնելով ՀՀ գլխավոր դատախազի, իսկ 2014 թվականի հուլիսի 18-ից մինչև 2018 թվականի հունիսի 11-ը՝ ՀՀ քննչական կոմիտեի նախագահի պաշտոնները, հիշյալ ժամանակահատվածում փաստացի մասնակցել է ձեռնարկատիրական գործունեություն իրականացնող մի շարք ՍՊ ընկերությունների կառավարմանը, բացի այդ ստացել է առանձնապես խոշոր չափերով` 190.000.000 ՀՀ դրամ կաշառք և խարդախության եղանակով կատարել առանձնապես խոշոր չափերով` 800.000.000 ՀՀ դրամ գույքի հափշտակություն: Ա. Հովսեփյանին մեղադրանք է առաջադրվել նաև հանցավոր ճանապարհով ստացված առանձնապես խոշոր չափերով` ընդհանուր 1.299.404.414 ՀՀ դրամ գույքը (փողերի լվացում) օրինականացնելու համար:
Ռոզա Վարդանյան
