Ինչ փաստաթղթի մասին է խոսել Մամեդյարովը, և ինչ են քննարկել ԵԱՀԿ համանախագահները Արցախում

ԵԱՀԿ Մինսկի խմբի համանախագահների և Արցախի Հանրապետության նախագահ Բակո Սահակյանի հանդիպումը «բավական լավ է անցել», Սահակյանը շնորհակալություն է հայտնել համանախագահներին՝ հասցեական հայտարարության համար։ Այս մասին Factor.am-ի հետ զրույցում ասաց ԱՀ նախագահ Բակո Սահակյանի մամուլի խոսնակ Դավիթ Բաբայանը։

Հիշեցնենք, որ հունիսի 10-ից մեկնարկել է ՄԽ համանախագահների այցը տարածաշրջան, որի ընթացքում վերջիններս այցելել են Հայաստան և Արցախ։

«Համանախագահների հետ քննարկվել են հիմնականում այն հարցերը, որոնք ավանդաբար միշտ քննարկվում են։ Նախագահը մատնանշել է նաև Ադրբեջանի կողմից տարվող դեստրուկտիվ քաղաքականության դրսևորումները, օրինակ, որ այրում են արտերը: Ադրբեջանը որևէ դրական քայլ չի կատարում, որպեսզի Վիեննայի և Սանկտ Պետերբուրգի պայմանավորվածությունները կյանքի կոչվեն, հակառակը՝ խոչընդոտում է, իր ջանքերի շնորհիվ էր, որ փակվեց ԵԱՀԿ երևանյան գրասենյակը։ Բնական է, որ այս ամենի մասին նույնպես խոսվել է, տեսնենք՝ ինչպես են զարգանալու իրադարձությունները, բայց կարծում եմ՝ համանախագահները հաստատակամ են, որ այդ փաստաթղթում նշված դրույթները կյանքի կոչվեն»,- ասաց նա:

Ադրբեջանի Արտաքին գործերի նախարար Էլմար Մամեդյարովն այսօր հայտարարել է, թե հակամարտության կարգավորմանն ուղղված վերջին փաստաթուղթը քննարկվել է նաև ապրիլի 29-ին Մոսկվայում կայացած եռակողմ հանդիպման ժամանակ: Ի՞նչ փաստաթղթի մասին է խոսել Ադրբեջանի արտաքին գերատեսչության ղեկավարը: Մեր այս հարցին ի պատասխան Արցախի նախագահի խոսնակը վստահեցրեց, որ այդ փաստաթուղթը Վիեննայի և Սանկտ Պետերբուրգի համաձայնություններն են, և «որևէ այլ փաստաթուղթ չկա»։

Ինչ վերաբերում է Էլմար Մամեդյարովի այն դիտարկմանը, թե պետք է ԼՂ ստատուս քվոյի հարցը օրակարգ բերել, Բաբայանն ասաց․ «Որպեսզի ստատուս քվոն փոխվի, պետք է փոխվի Ադրբեջանի իշխանությունների՝ տասնամյակներ շարունակ ձևավորված մտածելակերպը, ստատուս քվոն իրենց ուղեղներում պետք է փոխվի։ Եթե մի երկիր սպառնում է, որ կոչնչացնի քաղաքացիական ինքնաթիռը, որը պետք է թռիչք կատարեր Երևանից Ստեփանակերտ և հակառակը, հերոսացնում է սպային գլխատած մի տականքի, երբ Լապշինին ձերբակալում են՝ խախտելով բոլոր բարոյական և միջազգային նորմերը, էլ ի՞նչ կարգավիճակի մասին պետք է խոսել»։

Սեդա Ղուկասյան