18.06.2026 | 23:30
ԱՄՆ-ը Իրանին 300 միլիարդ դոլար չի վճարելու. Թրամփը հերքել է տարածվող լուրերը
Ավտոբուսի վթարից տուժած 31 վիրավորներից 4-ը վերակենդանացման բաժանմունքում են
02.09.2021 | 13:25
Մխչյան-Բյուրավան ավտոճանապարհին այսօր տեղի ունեցած պատահարի հետևանքով «Էրեբունի» ԲԿ տեղափոխված անձանցից 4-ը վերակենդանացման բաժանմունքում են, բժիշկները նրանց վիճակը գնահատում են ծանր։ Այս մասին Factor.am-ի հետ զրույցում ասաց բժշկական կենտրոնի մամուլի խոսնակ Շուշան Հունանյանը։
«Մյուսները հոսպիտալացվել են կենտրոնի տարբեր բաժանմունքներ, այդ թվում՝ վնասվածքաբանական, վիրաբուժական, նյարդավիրաբուժական՝ ախտորոշման և հետագա բուժօգնության նպատակով: Նրանց վիճակը գնահատվում է միջին ծանրության»,- տեղեկացրեց Շուշան Հունանյանը։
Արտաշատի բժշկական կենտրոնում այժմ 3 վիրավոր կա, որոնցից մեկին այս պահին վիրահատում են․ վնասվել է լյարդը։ Factor.am-ի հետ զրույցում կենտրոնից տեղեկացրեցին, որ մեծ մասն առաջին բուժօգնություն ստանալուց հետո դուրս է գրվել հիվանդանոցից։
Մասիսի ԲԿ տեղափոխված տուժածը ևս, համապատասխան բուժօգնություն ստանալուց հետո, դուրս է գրվել ամբուլատոր հսկողությունից։ Հետազոտող բժիշկ Հազարյանի տեղեկացմամբ՝ վթարից տուժած անձը մի շարք թեթև վնասվածքներ է ունեցել։
Հիշեցնենք՝ այսօր առավոտյան ժամը 08։23-ին Մխչյան-Բյուրավան ավտոճանապարհին ճանապարհատրանսպորտային պատահար է գրանցվել։ Պարզվել է, որ Գետազատ-Երևան երթուղին սպասարկող «FAV» մակնիշի ավտոբուսը (վարորդ՝ Ս․ Գ․, ծնված 1959 թ․) դուրս է եկել ճանապարհի երթևեկելի հատվածից և բախվել ծառին։
Պատահարի հետևանքով 16 տուժած հոսպիտալացվել է Արտաշատի, 1-ը՝ Մասիսի բուժկենտրոն, 14-ը՝ Երևանի «Էրեբունի» ԲԿ։
Ռոզա Վարդանյան
