ՀՀ և ՌԴ գլխավոր դատախազները Վլադիվոստոկում կայացած հանդիպման ընթացքում քննարկել են մի շարք ակտուալ հարցեր

ՌԴ Վլադիվոստոկ քաղաքում կայացել է ՀՀ գլխավոր դատախազ Արթուր Դավթյանի հանդիպումը Ռուսաստանի Դաշնության գլխավոր դատախազ Իգոր Կրասնովի հետ. տեղեկացնում են ՀՀ գլխավոր դատախազությունից:

Երկու երկրների գլխավոր դատախազներն այս տարվա ընթացքում 5-րդ հանդիպման ընթացքում քննարկել են իրենց ղեկավարած գերատեսչությունների համագործակցության ընթացքին և արդյունքներին, ինչպես նաև քրեական գործերով իրավական փոխօգնության շրջանակներում հաղորդակցության արդյունավետության բարձրացմանը վերաբերող հարցեր։

ՀՀ գլխավոր դատախազը շնորհակալություն է հայտնել ռուսական կողմին՝ 6-րդ Արևելյան տնտեսական համաժողովին մասնակցության հրավերի համար՝ համոզմունք հայտնելով, որ նման միջոցառումները նպաստում են տնտեսություններում ներդրումներին և ներդրողների իրավունքների պաշտպանության առավել գործուն մեխանիզմների կիրառմանը, այս ոլորտում փորձի փոխանակմանը։

Հանդիպման ընթացքում անդրադարձ է կատարվել անդրազգային հանցավորության դեմ պայքարում ջանքերը համատեղելու, քրեաիրավական ոլորտում երկու երկրների քաղաքացիների իրավունքների պաշտպանության, հանցագործությունների բացահայտման ոլորտում գործակցության սերտացման, երկու երկրների դատախազությունների միջև ստորագրված համագործակցության հուշագրով նախատեսված միջոցառումների իրականացման, դրա շրջանակներում պատվիրակությունների փոխացելությունների կազմակերպման խնդիրներին։

Երկուստեք բարձր է գնահատվել վերջին շրջանում գլխավոր դատախազների մակարդակով հանդիպումների պարբերականությունը, որը նոր ազդակ է հաղորդում ընթացիկ խնդիրների օպերատիվ կարգավորման պրակտիկայի ամրապնդմանը, նպաստում դատախազությունների միջև փոխադարձ վստահության մակարդակի բարձրացմանը:

Հանդիպման օրակարգային հարցերից է եղել 2020թ․-ի Արցախյան պատերազմից հետո տարածաշրջանում խաղաղության, կայունության և անվտանգության ապահովման հիմնախնդիրը, այդ համատեքստում բոլոր կողմերի ստանձնած պարտավորությունների կատարման վիճակը։

Երախտագիտություն հայտնելով ռուսական կողմին՝ Արցախի անվտանգության ապահովման խաղաղապահ առաքելության, ՀՀ-ի սահմանների առավել զգայուն հատվածների, հաղորդակցային ենթակառուցվածքների անվտանգությունն ապահովելու հարցում ներդրած ջանքերի համար՝ Արթուր Դավթյանն իր ռուս գործընկերոջ ուշադրությունը հրավիրել է ադրբեջանական կողմից արհեստածին, սուբյեկտիվ առիթներով ՀՀ բնակավայրերի հաղորդակցության ուղիներն արգելափակելու, իրադրությունն ապակայունացնող այլ գործողությունների վրա՝ առաջարկելով նմանատիպ միջադեպերի բացառման նպատակով իրավական օպերատիվ մեխանիզմներ մշակելուն ուղղված քայլեր։

Քննարկման առարկա է դարձել նաև 2020թ․-ի նոյեմբերի եռակողմ հայտարարությունից բխող՝ Ադրբեջանում ապօրինի կերպով պահվող ՀՀ ԶՈՒ զինծառայողների, քաղաքացիական և այլ անձանց վերադարձման վերաբերյալ պահանջների կատարման անհրաժեշտության հարցը։