Քաջարան համայնքի ղեկավար Մանվել Փարամազյանի կալանքի ժամկետը երկու ամսով երկարացվեց․ փաստաբան

Սյունիքի մարզի Քաջարան համայնքի ղեկավար Մամվել Փարամազյանը ևս երկու ամսով կմնա կալանքի տակ։ Երևան քաղաքի ընդհանուր իրավասության դատարանը, Մնացական Մարտիրոսյանի նախագահությամբ, այսօրվա որոշմամբ երկու ամսով երկարացրեց համայնքապետի կալանավորման ժամկետը։

Փարամազյանի պաշտպան Լուսինե Սահակյանը որոշ մանրամասներ է ներկայացրել քրեական գործից։ Մասնավորապես, պաշտպանի խոսքով՝ այս գործով հաղորդում ներկայացնող անձն ուղիղ կապի մեջ է գտնվում փոխվարչապետ Սուրեն Պապիկյանի ու ԱԺ ՔՊ-ական պատգամավոր Արմեն Խաչատրյանի հետ։

«Հաղորդում ներկայացնողի խոսքով՝ այդ պաշտոնյաներն իրեն հատուկ հեռախոսահամարներ են տրամադրել արագ ու անարգել կապ հաստատելու համար։ Ու կրկին այդ անձի խոսքերից՝ գործից տեղյակ է անձամբ «Փաշան» (փաստորեն՝ Նիկոլ Փաշինյանին Սյունիքի մարզում «Փաշա» են անվանում նաև նրա կողմնակիցները): Այս փուլում, սակայն, մեզ համար առավել կարևոր է այն հանգամանքը, որ թե՛ քաղաքական հրահանգն իջեցնողին, թե՛ այդ հրահանգը հլու կատարողներին չի կանգնեցնում անգամ անազատության մեջ գտնվելու հետևանքով Մանվել Փարամազյանի առողջությանն ու կյանքին սպառնացող վտանգը»,- ֆեյսբուքյան գրառման մեջ նշել է Սահակյանը։

Փաստաբանն ուշադրություն է հրավիրում նաև Փարամազյանի առողջական վիճակի վրա։ Ըստ նրա՝ համայնքապետի մոտ ախտորոշվել է «քնի օբստրուկտիվ ապնոէ» ծանր աստիճանի հիվանդությունը։ Այդ հիվանդությամբ տառապող անձինք, այլ խնդիրներից բացի, մշտապես գտնվում են քնի ընթացքում շնչառության կանգ ունենալու վտանգի առջև։ Նման հիվանդությամբ տառապող անձինք քնելու ընթացքում ստիպված են օգտագործել հատուկ սարք ու գտնվել կողմնակի խնամքի տակ։

«Արդեն կալանքի տակ գտնվելու ընթացքում Մանվել Փարամազյանի ախտորոշումը հաստատվել է նաև տեղի բժիշկների կողմից, մինչդեռ նրա կյանքին սպառնացող վտանգը կանխելուն ուղղված միջոցներն անհնար է ձեռնարկել քրեակատարողական հիմնարկի պայմաններում։ Այսինքն՝ գործ ունենք ոչ միայն անձի ազատության իրավունքի ոտնահարման, այլ նաև կյանքի իրավունքին ուղղված ոտնձգությունների ու անմարդկային վերաբերմունքի ցուցադրության հետ»,- նշել է փաստաբանը։

Հիշեցնենք՝ Մանվել Փարամազյանին մեղադրանք է առաջադրվել Խարդախությանը օժանդակելու կամ կազմակերպելու, ընտրողներին կաշառք տալու, կաշառք ստանալու, ընտրությունների ժամանակ բարեգործության արգելքը խախտելու կամ ընտրողի ազատ կամքի իրականացմանը խոչընդոտելու համար:

Ռոզա Վարդանյան