ԼՂ հակամարտության կարգավորումը մեկ օրվա հարց չէ․ Լավրով

Ռուսաստանի, Հայաստանի և Ադրբեջանի ղեկավարներն անձամբ են զբաղվում Ղարաբաղյան հակամարտության կարգավորման հարցով։ Դա մեկ օրվա աշխատանք չէ: Այս մասին չորեքշաբթի Միջազգային հարաբերությունների մոսկովյան պետական ինստիտուտում (МГИМО) կայացած հանդիպման ժամանակ հայտարարել է ՌԴ ԱԳ նախարար Սերգեյ Լավրովը, գրում է «Սպուտնիկը»:

Լավրովն ընդգծել է «Մոսկվայի վճռական դերակատարությունն» անցած տարվա նոյեմբերին հրադադարի հաստատման գործում:

«Ռուսաստանի, Հայաստանի ու Ադրբեջանի առաջնորդների միջև 2020թ․ նոյեմբերի 9-ին և 2021թ․ հունվարի 11-ին ձեռք բերված պայմանավորվածություններ կան։ Դա մեկ օրվա աշխատանք չէ, դրանով զբաղվում են երեք երկրների առաջնորդները, ինչպես նաև մեր զինվորականները, որոնք Լեռնային Ղարաբաղում ռուսական խաղաղապահ առաքելությունն են կազմում։ Նրանք գործում են լարվածության նվազման և վստահության հաստատման համար»,- հայտարարել է նա։

Նախարարը հավելել է, որ ռուս սահմանապահները նաև օգնում են իրենց հայ դաշնակիցներին՝ լուծել ադրբեջանցի հարևանների հետ խնդիրները։

Ինչ վերաբերում է Երևանի ու Մոսկվայի հարաբերություններին, ապա, Լավրովի խոսքով, երկկողմ տնտեսական համագործակցության զարգացումը «միանգամայն վստահ առաջ է գնում»։

«Հայաստանը մեր դաշնակիցն է։ Երեկ մեզ մոտ էր նոր արտգործնախարարը, մենք լավ բանակցություններ ենք ունեցել։ Ունենք շատ հարուստ երկկողմ օրակարգ՝ և՛ այցելությունների փոխանակում, և՛ խոշոր նախագծերի իրականացում, և՛ տնտեսական համագործակցության զարգացում: Այս ամենը շատ ինտենսիվ ու վստահ է ընթանում»,- ասել է ռուսաստանցի պաշտոնյան։

Տաթև Ֆռանգյան