16.09.2026 | 22:48
Հայաստանի մի շարք հասցեներում գազանջատումներ կլինեն
ՄԻԵԴ-ը ճանաչել է Ալեքսանդր Արզումանյանի խախտված իրավունքները. ՀՀ-ն 9000 եվրո կփոխհատուցի
Հասարակություն
31.08.2021 | 14:04
Մարդու իրավունքների եվրոպական դատարանն այսօր կայացրած վճռով ճանաչել է Հայաստանի նախկին արտգործնախարար Ալեքսանդր Արզումանյանի՝ հավաքների և միավորման ազատության իրավունքի խախտումը։
Մասնավորապես, 2008 թվականի Մարտի 1-ի դեպքերով հարուցված հայտնի «7-ի գործով» դատապարտված Ալեքսանդր Արզումանյանի ներկայացուցիչներ Լիպարիտ Սիմոնյանը և Վահե Գրիգորյանը դեռևս 2009-ին ՄԻԵԴ բողոք էին ներկայացրել՝ դատարանից պահանջելով ճանաչել արյունալի իրադարձությունների ժամանակ ձերբակալված Արզումանյանի խախտված իրավունքները։
«Եվրոպական դատարանը, թեկուզ երկար տարիներ անց, բայց ճանաչեց Կոնվենցիայի 11-րդ հոդվածով արձանագրված իրավունքը։ Մասնավորապես, դատարանն արձանագրել է՝ յուրաքանչյուր ոք ունի խաղաղ հավաքների ազատության և այլոց հետ միավորվելու ազատության իրավունք։ Որպես փոխհատուցում՝ Հայաստանը պարտավորվել է Ալեքսանդր Արզումանյանին վճարել 9000 եվրո»,- Factor.am-ի հետ զրույցում մանրամասնեց Արզումանյանի ներկայացուցիչ Լիպարիտ Սիմոնյանը։
Անցյալ տարվա օգոստոսի 27-ին Վճռաբեկ դատարան էր ներկայացվել նաև Արզումանյանի վճռաբեկ բողոքը՝ արդարացման պահանջով։ Այս մասով, սակայն, դեռևս որոշում կայացված չէ։
Հիշեցնենք՝ ՀՀ նախկին արտգործնախարար Ալեքսանդր Արզումանյանը 2009-ի հունիսին Քրեական օրենսգրքի 225-րդ հոդվածի 1-ին մասով` «զանգվածային անկարգություններ կազմակերպելը», դատապարտվել էր 5 տարվա ազատազրկման, սակայն համաներման մասին Ազգային ժողովի որոշման հիման վրա երեք այլ ընդդիմադիր գործիչների հետ ազատ արձակվել դատարանի դահլիճից:
Արզումանյանը 2017 թվականից կրկին անցել է դիվանագիտական ծառայության և Դանիայում, Նորվեգիայում, Շվեդիայում, Իսլանդիայում, Ֆինլանդիայում Հայաստանի արտակարգ և լիազոր դեսպանն է:
Ռոզա Վարդանյան
