Քաղաքականություն
30.08.2021 | 13:01ԱԺ Մարդու իրավունքների պաշտպանության և Հանրային հարցերի մշտական հանձնաժողովը կազմակերպել է հանդիպում հայաստանյան լրատվամիջոցների ղեկավարների, ԱԺ-ում հավատարմագրված լրագրողների, լրագրողական կազմակերպությունների և ԱԺ ղեկավարության մասնակցությամբ ՝ ԱԺ-ում հավատարմագրված լրագրողների ազատ տեղաշարժի սահմանափակման և կարգի վերաբերյալ:
ԱԺ «Հայաստան» խմբակցության պատգամավոր Արեգնազ Մանուկյանը նշեց, որ քննարկմանը ներկա է՝ որպես նախկինում լրագրողական գործունեություն ծավալած անձ, որը ԱԺ-ում տեսել է տարբեր սահմանափակումներ: «Այդուհանդերձ լրագրողները կարողանում էին ակցիաներ իրականացնել, կարողանում էին գազային պայմանագրի շրջանակներում ԱԺ-ում ակցիաներ անցկացնել, և հիմա այդ լրագրողներից մեկն իշխանական պատգամավոր է: Նիկոլ Փաշինյանը հայտարարում էր, որ մամուլն ազատ է ավելին, քան երբևէ, բայց հիմա ինքներս ենք մեր մաշկի վրա զգում, որ մամուլը երբեք այսքան անազատ չի եղել»,- ասաց պատգամավորը:
Նա նաև ընդգծեց, որ իշխանության այս գործողությունները պայմանավորված են մի քանի հանգամանքով, առաջինը՝ նրանք ունեն վախեր:
«Ինչպես ասում են՝ գող, սիրտը՝ դող, մարդիկ հանձնել են հայրենիք, հանցագործություն են թույլ տվել, շարունակում են հանձնել: Իրենց բանավոր կամ գրավոր պայմանավորվածությունների հիման վրա, թշնամին կամաց-կամաց առաջ է գալիս… Իրենց այս լկտիությունը հասել է այն աստիճանի, որ իրենց բռնապետական նկրտումները փորձում են կիրառել նաև պատգամավորների նկատմամբ… Իշխանությունն ուզում է, որ ընդդիմադիրներն ԱԺ դահլիճ մտնեն առանց հեռախոսի, որ չֆիքսեն ծեծկռտուքները»,- նշեց Արեգնազ Մանուկյանը:
ԱԺ-ում տեղի ունեցած ծեծկռտուքի ժամանակ Վլադիրմիր Վարդանյանը հարցնում էր՝ դուք լրագրո՞ղ եք, թե՞ պատգամավոր, հիմա ես ուզում եմ Վլադիմիր Վարդանյանին հարցնել՝ Դուք պատգամավո՞ր եք, թե՞ մարդ ծեծող խուլիգան»,- ընդգծեց պատգամավորը:
Մանրամասները՝ տեսանյութում:
