Գորիս-Կապան՝ փակված ճանապարհի փոխարեն երթևեկությունը կազմակերպվում է Աղվանի-Տաթև դժվարանցանելի ճանապարհով․ՏԵՍԱՆՅՈՒԹ

Արդեն երկրորդ օրն է, ինչ ադրբեջանական կողմը փակ է պահում Գորիս-Կապան ՀՀ միջպետական ճանապարհը։ Նախօրեին տեղի ունեցած եռակողմ բանակցություններն արդյունք չեն տվել, այս մասին Factor.am-ի հետ զրույցում տեղեկացրեց Կապանի համայնքապետ Գևորգ Փարսյանը։ Բանակցությունները, ըստ ԱԱԾ-ի տարածած հաղորդագրության, այսօր շարունակվում են եռակողմ ձևաչափով։

«Իրավիճակը դեռևս նույնն է, ոչ մի փոփոխություն չի եղել երեկվա դրությամբ, սպասում ենք՝ բանակցություններն ավարտվի, տեսնենք ինչ է լինում»,- նշեց Կապանի համայնքապետը։

Միջպետական ճանապարհի փակումը մեքենաների խոշոր կուտակում էր առաջացրել․ խցանման մեջ էին հայտնվել ոչ միայն մարդատար, այլև Իրանից ժամանող և մեկնող բեռնատար ավտոմեքենաներ։ Մոտ 50 բեռնատար կանգնած էր մնացել Երևան-Կապան միջպետական ճանապարհի Կարմրաքարի և Գորիսի հատվածներում։ Միջպետական ճանապարհի փակումից հետո երթևեկությունը կազմակերպվել է Կապան-Աղվանի-Տաթև այլընտրանքային ճանապարհով, որը բեռնատարների համար դժվարանցանելի է։

«Քանի որ այս պահին այդ ճանապարհահատվածում շինարարական աշխատանքներ են ընթանում, երեկվանից այդտեղով երթևեկում էին միայն մարդատար ավտոմեքենաները։ Այս ժամի դրությամբ՝ արդեն սկսել են նաև իրանական բեռնատարներն ընթանալ։ Ճիշտ է, ոչ նույն արագությամբ, բայց կարևորը կուտակումների խնդիր չի առաջանում»,- Factor.am-ի հետ զրույցում տեղեկացրին ՀՀ տարածքային կառավարման և ենթակառուցվածքների նախարարության լրատվական ծառայությունից։

«Քաղաքացիական պայմանագիր» խմբակցության կապանցի պատգամավոր Դավիթ Դանիելյանը մեզ հետ զրույցում դժվարացավ հստակ նշել, թե քանի բեռնատար և մարդատար մեքենա է կուտակված ճանապարհին։ Ըստ նրա՝ խոսքը մոտ 100 մեքենայի մասին է․

«Այլընտրանքային ճանապարհը դեռ նախորդ տարվանից վերանորոգվում է և անկախ հանգամանքներից՝ կառուցվելու էր, ուղղակի այս իրավիճակում ավելի արագ ենք փորձում ինչ-որ աշխատանքներ իրականացնել, որ մեքենաները կանգնած չմնան։ Ճանապարհի որոշ հատվածներում քարային մասը շատ է և վնասում է մեքենաները, աշխատում են մի քանի ժամվա ընթացքում դա կարգավորել, գրունտային շերտը փակել։ Բացի այդ պարբերաբար ջուր են լցնում, որ փոշին վերանա ճանապարհահատվածից»,- Factor.am-ին ասաց պատգամավորը։ Դանիելյանի խոսքով՝ ՃՈ մեքենաներն ուղեկցում են բեռնատարներին։

Ռոզա Վարդանյան