Կոտայքի մարզի Զովունի համայնքում 14-ամյա տղա երեխայի մարմին է հայտնաբերվել՝ կախված վիճակում։ Ինչպես Factor.am-ի հետ զրույցում տեղեկացրեց Քննչական կոմիտեի մամուլի խոսնակ Վարդան Թադևոսյանը, երեկ ժամը 12։15-ի սահմաններում Եղվարդ քաղաքի «Նաիրիի» բժշկական կենտրոնից ոստիկանության բաժին ահազանգ է ստացվել, որ համայնքի տներից մեկի տանիքում՝ ձգումներ կատարելու մետաղյա ձողից սպորտային գոտիով կախված վիճակում հայտնաբերել են տղայի դի։
«Նշանակվել է դատաբժշկական փորձաքննություն, դիակի արտաքին զննությամբ բռնության հետքեր չեն հայտնաբերվել։ Տղայի գրպանում եղել է երկտող, նյութեր են նախապատրաստվում»,- նշեց Թադևոսյանը։
Դեպքի առթիվ հարուցվել է քրեական գործ՝ Քրեական օրենսրքի 110-րդ հոդվածի 1-ին մասով (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը)։
Ռոզա Վարդանյան
