22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
Դավիթ Հարությունյանը ՔԿՀ-ում արված Հ1-ի «Լավ երեկոյի» ռեպորտաժն անթույլատրելի է համարում
Հասարակություն
14.03.2018 | 15:31
ՀՀ արդարադատության նախարար Դավիթ Հարությունյանն անթույլատրելի է համարում Հանրային հեռուստատեսությամբ հեռարձակվող «Լավ երեկո» հաղորդաշարի լրագրող Արուսիկ Տիգրանյանի՝ Մարտի 8-ի կապակցությամբ «Աբովյան» քրեակատարողական հիմնարկում պատրաստած «ռեպորտաժը»:
Լրագրողների հետ զրույցում Դավիթ Հարությունյանը նշեց՝ միջադեպի առնչությամբ լուրջ քննարկումներ է ունենալու Հանրային հեռուստաընկերության ղեկավարության հետ: «Կարծում եմ դա անթույլատրելի է, ինքս շատ մտահոգված եմ այդ դեպքով և շատ լուրջ քննարկում եմ ունենալու Հ1-ի ղեկավարության հետ: Իմ խորին գնահատմամբ՝ սա առաջին դեպքը չէ, այլ երկրորդ լուրջ բացթողումն է, որը տեղի է ունեցել Հ1-ի կողմից: Մենք դա քննարկման առարկա ենք դարձրել»,- նշեց Հարությունյանը՝ չմասնավորեցնելով, թե որն էր առաջին դեպքը:
Լրագրողները Դավիթ Հարությունյանին հիշեցրին՝ երբ 2007 թվականին նախարար էր, լրագրողների մուտքը ՔԿՀ-ներ համեմատաբար ազատ էր, ինչու է այժմ խոչընդոտ ստեղծվում. «Որովհետև այն ժամանակ թիվը սահմանափակ էր այն անձանց, ովքեր ներկայանում էին լրագրող: Այն ժամանակ այլ կանոնակարգ էր գործում, այսօր յուրաքանչյուր անձ կախում է իր կրծքից մի բեյջ, անունը դնում Elak.am, ներկայանում և ասում է՝ խնդրում եմ թույլ տվեք մուտք գործել քրեակատարողական հաստատություն: Քրեակատարողական հաստատությունը, չմոռանանք, հանգստյան վայր չէ, կալանավայր է, հատուկ ռեժիմային գոտի և պահանջում է նաև հատուկ վերաբերմունք»,- դարձյալ լրագրողներին մեղադրելու միջոցով փորձեց արդարանալ Հարությունյանը:
Հիշեցնենք՝ Հանրային հեռուստաընկերության լրագրողի պատրաստած «ռեպորտաժը» դատապարտված կանանց գաղութից սուր քննադատության արժանացավ հասարակության կողմից: Իրավապաշտպանները հայտարարեցին՝ տեղի ունեցածի պատասխանատուն ոչ միայն հարկատուների հաշվին սնվող Հանրային հեռուստաընկերությունն է, այլև Արդարադատության նախարարությունը:
