06.06.2026 | 21:21
Եղիշե Մելիքյանը՝ Ղազախստանի հավաքականի հետ ոչ-ոքիի մասին․ ՏԵՍԱՆՅՈՒԹ
ԱԺ-ում սահմանային իրավիճակի վերաբերյալ փակ քննարկում տեղի կունենա․ ՏԵՍԱՆՅՈւԹ
Հասարակություն
17.08.2021 | 18:35
Այսօր կայացած ԱԺ արտահերթ նիստի սկզբում «Հայաստան» խմբակցության ղեկավար Սեյրան Օհանյանն առաջարկել էր խորհրդարանում փակ կամ բաց ռեժիմով քննարկում կազմակերպել սահմանային իրավիճակի վերաբերյալ։ «Սահմանային իրավիճակի վերաբերյալ իրարամերժ տեղեկություններ են գալիս, եկեք քննարկում կազմակերպենք, հասկանանք իրավիճակը, փարատենք հասարակության մտահոգությունները»,- ասել էր Օհանյանը:
«Հայաստան» խմբակցության քարտուղար Արծվիկ Մինասյանն այսօրվա նիստի ավարտին հարց բարձրացրեց, թե ինչու վերոնշյալ քննարկումը չի կազմակերպվում։ Մինասյանին ի պատասխան՝ ԱԺ նախագահ Ալեն Սիմոնյանը հայտնեց, որ «Հայաստան» խմբակցության առաջարկն ընդունվել է․ «Կա պայմանավորվածություն, մենք ժամանակացույց կհասկանանք, ամենայն հավանականությամբ, այդ քննարկումը տեղի կունենա վաղը, այսօր տեխնիկապես անհնար էր»,- նշեց Ալեն Սիմոնյանը։
«Իմ քայլը» խմբակցության ղեկավար Հայկ Կոնջորյանն էլ հաստատեց, որ Օհանյանի հետ զրուցել և պայմանավորվել են, որ առավել նպատակահարմար է քննարկումը կազմակերպել վաղը։ «Այդ ուղղությամբ աշխատում ենք, վաղն առավոտյան հանդիպման քննարկման վերաբերյալմանրամասները՝ ժամի, հրավիրյալ անձի կամ անձանց, կփոխանցենք մեր ընդդիմադիր գործընկերներին»,- հայտնեց Կոնջորյանը։Նա նաև հավելեց, որ հանդիպում-քննարկումը տեղի կունենա խորհրդարանում՝ փակ ռեժիմով։
Արփի Հակոբյան
