Դատավորն ինքնաբացարկ չհայտնեց, Առուշանյանի պաշտպանական կողմը բոյկոտեց նիստը

Գորիսի համայնքապետ Առուշ Առուշանյանի նկատմամբ կալանավորումը որպես խափանման միջոց ընտրելու որոշման դեմ բողոքի քննությունը շարունակվեց՝ առանց պաշտպանների և Առուշանյանի մասնակցության։

Վերաքննիչ քրեական դատարանը՝ դատավոր Մնացական Հարությունյանի նախագահությամբ, որոշում կայացրեց մերժել ինքնաբացարկ հայտնելու միջնորդությունը և շարունակել բողոքի քննությունը։

Պաշտպան Էրիկ Ալեքսանյանը լրագրողների հետ զրույցում համոզմունք էր հայտնել, որ դատարանը մերժելու է միջնորդությունը, ինչի պատճառով բոյկոտելու են նիստը: «Մենք չունենք վստահություն դատարանի նկատմամբ, ուստի արժանի չենք համարում մեր մասնակցությունը բողոքի քննությանը»,- պարզաբանել էր փաստաբանը։

Ըստ Ալեքսանյանի՝ ԱԱԾ վերջին գործողություններն են ստիպում կասկածել դատավորի անաչառության վրա. «Սյունիքի բոլոր համայնքների ղեկավարների վերաբերյալ կալանավորման օրինականության վերաբերյալ բողոքները մուտք անելուց հետո, ԱԱԾ գործողությունները չեն վկայում նրա մասին, որ այս բոլոր դատավորները, որոնք համայնքների ղեկավարների բողոքների քննություն են իրականացնում, չեն ընտրվել պատահաբար»։

Դատարանը մերժեց միջնորդությունը, պաշտպանը՝ լքեց նիստերի դահլիճը, բողոքի քննությունը՝ հետաձգվեց։ Այն կշարունակվի այսօր ժամը 14։00-ին։

Հիշեցնենք, որ «Հայաստան» դաշինքի ընտրական ցուցակի 32-րդ համարը զբաղեցնող Առուշ Առուշանյանին մեղադրանք է առաջադրվել Քրեական օրենսգրքի 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով և 38-154.2-րդ հոդվածի 3-րդ մասով: Խոսքը, համապատասխանաբար, երկու կամ ավելի անձանց կաշառք տալը նախապատրաստելու, պաշտոնեական դիրքն օգտագործելով ընտրական իրավունքի իրացմանը խոչընդոտելը կազմակերպելու և գույքին վնաս պատճառելով կամ գույքին վնաս պատճառելու սպառնալիքով, ծառայողական կամ այլ կախվածությունն օգտագործելով՝ ընտրողին թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից որևէ մեկի օգտին կողմ կամ դեմ քվեարկելուն, ընտրություններին մասնակցելուն կամ ընտրություններին մասնակցելուց հրաժարվելուն կամ մեկից ավելի անգամ քվեարկելուն կամ այլ անձի փոխարեն քվեարկելուն հարկադրելու մասին է։

Առաջադրված մեղադրանքը Առուշանյանը չի ընդունում՝ այն որակելով շինծու և անլուրջ։

Ռոզա Վարդանյան