Առաջին կիսամյակում տնտեսական ակտիվությունն աճել է 8 %-ով․ առավել մեծ աճ են գրանցել շինարարությունն ու արտաքին առևտրաշրջանառությունը

Այս տարվա հունիսին նախորդ տարվա նույն ամսվա համեմատ տնտեսական ակտիվության ցուցանիշն աճել է 8 %-ով։ Այս մասին տեղեկանում ենք Պետական վիճակագրական կոմիտեի հրապարակած տվյալներից։

Արդյունաբերական արտադրանքի ծավալը կազմել է 189 միլիարդ 908.1 մլն դրամ՝ նախորդ հունիսի համեմատ աճելով 1,3 %-ով։

Շինարարության ծավալը կազմել է 25 միլիարդ 156 միլիոն դրամ։ 12 ամսում աճը կազմել է 1,3 %։

Առևտրաշրջանառության ծավալը հունիսին կազմել է 268 միլիարդ 231 միլիոն դրամ։ Նախորդ հունիսի համեմատ առևտրաշրջանառությունն աճել է 10,3 %-ով։

Ծառայությունների ծավալը կազմել է 152 միլիարդ 101 մլն դրամ, աճը կազմել է 12 %:  20.1 %-ով էլ աճել է արտաքին առևտրաշրջանառության ծավալը։

5 % տնտեսական ակտիվության աճ՝ առաջին կիսամյակում

Համեմատելով այս տարվա առաջին կիսամյակը նախորդ տարվա նույն ժամանակահատվածի հետ՝ տնտեսական ակտիվության ցուցանիշն աճել է 5 %-ով։
Առավելապես աճել է շինարարության ծավալը, որը նախորդ տարվա այս ժամանակահատվածում կորոնավիրուսով պայմանավորված սահմանափակումներից ամենաշատ տուժած ոլորտներից մեկն է։

Հունվար-հունիս ամիսներին նախորդ տարվա նույն ժամանակահատվածի համեմատ շինարարության ծավալն աճել է 10,8 %-ով:

Արտաքին առևտրաշրջանառությունը այս 6 ամսում աճել է 13,1 %-ով։ Ընդ որում՝ ավելի շատ աճել է արտահանումը, քան ներկրումը։

Այսպես․ Հայաստանից արտահանումը կազմել է 137․5 միլիարդ դրամ՝ նախորդ տարվա նույն ժամանակահատվածի համեմատ աճելով 23,3 %-ով, իսկ ներկրումը կազմել է 223,2 միլիարդ դրամ։ Աճը կազմել է 7,9 %:

Դատելով թվերից՝ կարելի է ասել, որ տնտեսական ակտիվությունը մարտից սկսած վերականգնման միտում է ցույց տալիս։ Վերջին ամիսներին տնտեսական ակտիվության ցուցանիշը ամենաբարձր աճը գրանցել է ապրիլին, ինչը մեծապես պայմանավորված է բազային էֆեկտով, քանի որ նախորդ տարվա ապրիլին Հայաստանը գտնվում էր արտակարգ դրության պայմաններում, ինչով պայմանավորված երկրում գործում էին որոշակի սահմանափակումներ։

Անժելա Պողոսյան