14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Հայ ռազմագերիներ Դավիթ Դավթյանին և Գևորգ Սուջյանին մինչև 15 տարվա ազատազրկում է սպառնում
Հասարակություն
26.07.2021 | 15:17
Բաքվի ծանր հանցագործությունների դատարանում շարունակվում է հայ ռազմագերիներ Դավիթ Դավթյանի և Գևորգ Սուջյանի նկատմամբ հարուցված շինծու քրեական գործով դատավարությունը, որոնց Ադրբեջանը մեդադրում է լրտեսության մեջ։ Նիստն ընթանում է դատավոր Ալի Մամեդովի նախագահությամբ։
Ադրբեջանական լրատվամիջոցների հաղորդմամբ՝ դատախազը ներկայացրել է մեղադրական եզրակացությունը։ Ըստ դրա՝ հայ գերիները, իբր, ապօրինի հատել են պետական սահմանը, հավաքել ռազմական բնույթի տեղեկատվություն և դրանք փոխանցել Հայաստանի հատուկ ծառայություններին ու զբաղվել լրտեսությամբ։ Նշվել է նաև, որ հայ գերիները, իբր, հավաքագրվել են Հայաստանի հատուկ ծառայությունների կողմից 2019 թվականին, և 2020-ին Ադրբեջանին տարածք թափանցել Սյունիքից։
Հայ գերիներին շինծու մեղադրանք է առաջադրվել քրեական օրենսգրքի 228-րդ (զենքի ապօրինի պահում), 279-րդ (զինված խմբերի ստեղծում), 318-րդ (պետական սահմանի անօրինական հատում), 276-րդ (լրտեսություն) հոդվածներով։
Դատավորը նշել է, որ եթե մեղադրանքները դատաքննության ընթացքում հաստատվեն, հայ գերիներին սպառնում է մինչև 15 տարի ժամկետով ազատազրկում։ Հայ գերիներից Գևորգ Սուջյանը նաև ցուցմունք է տվել՝ նշելով, որ ստեղծել է բարեգործական կազմակերպություն և Արցախում զբաղվել է մարդկանց օգնելով, չի համագործակցել հատուկ ծառայությունների հետ։
Նշենք, որ «Նոր Հայաստան-Հայրենիք-Սփյուռք» բարեգործական ՀԿ հիմնադիր-նախագահ Սուջյանն ու Դավթյանը գերեվարվել են հրադադարի հաստատումից հետո, Բերձոր-Շուշի ճանապարհին։
Էմմա Չոբանյան
